Өнөөдөр МАХН-аас хууль шүүхийн байгууллагын ажилтнуудын ёс зүйгүй үйлдэлд хариуцлага тооцуулах талаар мэдээлэл хийх үеэр МАХН-ын дарга Н.Энхбаяр С.Ганбаатарын талаар байр сууриа илэрхийллээ.
Тэрбээр "Монгол Улсын Ерөнхийлөгч сонгогдмогцоо альваа намын гишүүнчлэлээсээ татгалздаг. Би ч бас тухайн үед түтгэлзэж байсан. Одоо Х.Баттулга гэдэг хүн түтгэлцчихсэн байгаа. Энэ хүн аль нэг намын талд орж болохгүй. Харамсалтай Ерөнхийлөгч "АН-ын журмын нөхдөө та нар минь эвтэй найртай байгаарай" гэх зэргээр АН-ын гишүүн юмшиг хандсан нь үнэхээр хууль зөрчсөн үйлдэл. Х.Баттулга гэдэг хүн хууль мэддэггүй юм уу, эсвэл зөвлөхүүд зөвлөдөггүй юм уу, сонгууль ойртохоор мартсан байсан АН-аа гэнэт санаад тэрийгээ эвтэй нэгдэлтэй болгох гээд байгаа юм уу, тэндээс дэвшинэ гэж бодоод байгаа юм уу, ямар ч байсан энэ хууль зөрчсөн хариуцлагагүй үйлдэл болсон. Би Ерөнхийлөгч байхдаа хэзээ ч ийм үйлдэл гаргаж байгаагүй.
С.Ганбаатар бол улстөрийн хүчний хувьд хэлсэндээ байх зарчим баримталдаг гэдэг. Гэтэл УИХ-ын сонгуулийн дараа С.Ганбаатар бидэнд мэдэгдэлгүйгээр ярилцлага өгч, ирэх дөрвөн жил зөвхөн Эрдэнэтчүүдийнхээ төлөө ажиллана, Ерөнхийлөгчийн сонгуульд нэр дэвшихгүй гээд мэдэгдчихсэн. Үүний дараа Ерөнхийлөгч Х.Баттулга шинээр бүрэлдсэн УИХ-ын бүрэн эрхийг нээхээс өмнө УИХ-д суудалтай намын дарга болон гишүүдийг хүлээж авч уулзсан.
Энэ үеэр С.Ганбаатар Ерөнхийлөгчийн сонгуульд нэр дэвшихгүй гэдгээ дахин хэлээд нутгийн ах Х.Баттулга Ерөнхийлөгч таныг дэмжиж ажиллана хэмээн надтай зөвлөхгүйгээр мэдэгдчихсэн. Бас нэг зүйл хэлсэн. 2017 оны Ерөнхийлөгчийн сонгуулийн өмнө Х.Баттулга танд Ерөнхийлөгчийн сонгуульд нэр дэвшихгүй гэж амлаж байсан. Гэтэл МАХН-ынхан нэр дэвш гэсээр байгаад дэвшүүлсэн. Тиймээс таниас уучлалт гуйж байна гэсэн. Тухайн үед Х.Баттулга ийм яриа болсон нь үнэн. Гэхдээ С.Ганбаатар нэр дэвшиж байж, МАН-ын саналыг хувааж байж сонгуульд амжилттай оролцох нөхцөл бололцоо бүрдсэн юм. Тиймээс МАХН-д баярлаж байгаагаа илэрхийлж байсан.
Би бол хоёр хүн хоорондоо ярьж улстөр хийх нь зохимжгүй гэж үздэг. Үүнийг өөрчлөх ёстой. Гэтэл сүүлийн үед С.Ганбаатар нэр дэвших ч юм шиг зүйл ярих болсон. Уг нь намынхантайгаа зөвлөлдөөд Х.Баттулга Ерөнхийлөгчид хэлж байсан үгнээсээ буцсан шүү эсвэл бид хоёрын хооронд бас нэг яриа болсон. Намайг дэвш гээд байгаа ч гэдэг юмуу ний нуугүй ярьвал ойлгох байсан” гэлээ.
