Амьдад нь  сэрүүнд хөшөө дурсгалыг нь босгох нь байдаг бол мөн гэгээн тунгалаг үед нь “хойд дүр”-ийг тодруулах явдал гардаг болжээ. Тэгвэл алдарт бөх Х.Баянмөнхийн хойд дүр Архангайгааас тодорчээ. Тус аймгийн Тариат сумын харьяат, цэргийн заан Ө.Батсуурь нь их аваргатай царай зүс, бие хаагаар усны дусал мэт адилхан нь бөхчүүд, бөх сонирхогчдыг гайхуулж байна. Барилдааны өнгө нь ч Баянаа аваргын ид үеийг санагдуулсан хурц дайчин агаад саяхан болж өнгөрсөн Улс тунхагласны ойн барилдаанд одоо үеийн манлай бөхчүүдийн нэг улсын аварга Хангайг төвөггүйхэн давсан нь үүний нэг жишээ юм. Харин их аваргых нь “хойд дүр” хүчтэй өрсөлдөгчийх нь нэг болох Архангайгаас тодорсонд увсчууд таагүй байгаа гэнэ. Улсын баяр наадамд түрүүлсэн, үзүүрлэсэн, шөвгөрсөнөөрөө энэ хоёр аймгийнхан ширүүн өрсөлдсөөр ирсэн.