УИХ-ын гишүүн Г.Дамдинням цагдаа өөрийг нь зогсоон, 30 минут шалгасан тухай өчигдөр УИХ-ын цахим чуулганы үеэр ХЗДХ-ийн сайдад хэлсэн нь олон нийтийн дургүйцлийг төрүүлсэн билээ. 

Тэрбээр "Би УИХ-ын гишүүн хүн. Ордонд цуглах ажилтай гээд явж байсан намайг зам дээр 30 минут зогсоолоо. Харилцаа хандлага, ойртож байгаа контакт зэрэгт нь эрүүл, аюулгүй харилцаа алга. Дээрээс өгч байгаа үүрэг даалгавар газар дээрээ хэрэгжихгүй байна" гэсэн. Уг асуудлаа тэрбээр "Таних, танихгүй тухай асуудал огт яриагүй юм. Бичиг баримтаа үзүүлээд явдаг. Хугацаа дуусаад бүтэн хэлж чадсангүй. Харилцаа, Хүний эрхийн асуудал яригдаж эхэлж байна. Ажлаа хийж байгаа хүмүүсийг ойлгож байна. Гэхдээ хүний эрхийг, халдвар хамгааллын дэглэмийг анхаарах ёстой" гэж тайлбарласан ч иргэд шүүмжлэн, дургүйцлээ илэрхийлсээр байсан юм. 

Харин тэрбээр өөрийн сошиал хуудсаараа дамжуулан иргэдээс уучлалт гуйв.

Тодруулбал, "Хүний эрхийн зөрчил, Халдвар хамгааллын дэглэмийн мөрдөлт, УОК-н Үүрэг чиглэлийн биелэлтэд гарч байгаа асуудлаар үг хэлэхдээ Цагдаа зогсоосон талаар зохимжгүй жишээ авсанд минь УУЧЛААРАЙ. Олон түмний санал шүүмжлэлийг авч хичээн ажиллах болно" хэмээжээ.