Оюутолгойн компанийн 66 хувийг эзэмшигч "Туркойз Хилл Ресурс" компани өөрийн албан ёсны хуудастаа Монгол Улсын Татварын Ерөнхий газраас Оюутолгой ХХК-д 228 сая ам.долларын акт тавьсан талаар мэдээлжээ. Татварын ерөнхий газраас Оюутолгой компанийн 2016-2018 онд төлсөн татварт аудит хийсэнтэй холбоотойгоор энэхүү торгуулийг тавьсан байна. 

"Туркойз Хилл Ресурс" компани Монголын татварын албанаас тавьсан актыг хэр үндэслэлтэй эсэх талаар судалж эхэлсэн бөгөөд Монголын хуульд заасан хугацаанд хариу өгөхөө мэдэгдсэн байна. Түүнчлэн Монголын Татварын албаны аудитын дүгнэлт нь 2015 онд Монгол Улсын Засгийн газар хөрөнгө оруулагч талтай хийсэн Оюутолгойн далд уурхайн бүтээн байгуулалт, санхүүжилтийн төлөвлөгөөнд тусгасан татварын хөнгөлөлтийг үндэслэсэн байгааг дурджээ. 

Эргэн сануулахад,  Монгол Улсын Татварын ерөнхий газраас Оюутолгой компанид 2012 онд 130 сая, 2018 онд 155 сая ам.долларын акт тавьж байсан бөгөөд хөрөнгө оруулагч тал актыг үндэслэлгүй гэж үзэж, зарим асуудлаар Арбитрт хандахаа мэдэгдсэн байдаг. 

Татварын акттай холбоотой мэдээг ЭНДЭЭС дэлгэрэнгүй сонирхоно уу.