Монголчууд ядуу биш, салбарын сайд, төрийн яам агентлагийн дарга нарын төсвийн үрлэгэн зардал эдийн засгийг туйлдуулж байна. БОАЖ-ын сайд Н.Цэрэнбат гэж төсвийн мөнгийг баруун солгойгүй үрдэг “жаал” байлаа. Азаар 2020 оны сонгуулиар УИХ-д Увс аймагт нэр дэвшээд ялагдсан. Төр түмэн нүдтэй гэж энэ. Түүнээс биш, төсвийн мөнгийг Увс руу урсгадаг байлаа. Тэгж мөнгө зарцуулснаараа сонгогддог бол Н.Цэрэнбат энэ парламентын манлайд зогсох байлаа. Дахин сайд болохгүйгээ мэдсэн юм шиг 2020 оны 6 сард төсвийн мөнгийг баруун солгойгүй цацсан. Сонгуулийн үед буюу 6 дугаар сард “Хоггүй цэвэрхэн Монгол” аяны хүрээнд 450 сая төгрөг зүгээр л салхинд хийсгэсэн. “Хоггүй цэвэрхэн Монгол” аяны төсвийн санхүүг үзвэл ёстой жинхэнэ “хог” гэхэд хатуудахгүй.
Н.Цэрэнбат Хятадад элэгтэй гэмээр. Ам л ангайвал Хятадаас төдөн тэрбумаар авна гэдэг байлаа. Янз бүрийн шүүлтүүр шахах гэж их оролдсон.
Харин 2020 оны 3 дугаар сард санасандаа хүрч, Хөвсгөл, Ховд, Увс, Орхон аймгийн дулааны станцад утаа шүүлтүүр суурилуулахаар болж 3 тэрбум төгрөг гаргахаар болжээ. Гуравдугаар сард дулааны станц ажиллахаа болих үед гурван тэрбум гаргаж, дөрвөн аймгийн ДЦС-д утаа шүүх фильтр суурилуулах болсон нь хачирхалтай. Цагаа олоогүй, үр дүнгүй ажил гэж энэ биз ээ. Энэ ажлыг гүйцэтгэхээр БНХАУ-ын компани болох “КАН МЭЙ ХУАН БАО”-тай шууд гэрээ байгуулжээ. Захирал нь Xu Jin Zhuang Zi гэдэг нэртэй, ёстой хаанаас ч харсан “цэвэр” хятад компани, хүн гүйцэтгэжээ.
Фильтр суурилуулах нь агаарын бохирдол бууруулах хамгийн муу арга гээд, автобусанд, айлын янданд шүүлтүүр суурилуулах Н.Цэрэнбатыг санаархлыг тас цохисон ч, сонгууль Ковид давхацсан үед сэмхэн хийж, 4-хөн аймгийн 4 цахилгаан станцад 3 тэрбумаар утаа шүүх фильтр суурилуулж чаджээ.
