Саяхан улс болон нийслэлийн хөрөнгө оруулалтаар авсан хог тээврийн 25 автомашиныг дүүргүүдийн удирдлагад гардууллаа.  Энэ үеэр Улаанбаатар хотын Ерөнхий менежер бөгөөд ЗАА-ны дарга Т.Гантөмөр “Нийслэлийн 173 хороонд хог хаягдлыг тээвэрлэн цуглуулахад тусгай зориулалтын машины хүрэлцээ, хангамж муу. Хотын төсвөөс 163 машиныг 2012 онд дүүргийн хог тээврийн байгууллагад өгснөөс хойш паркаа шинэчлээгүй. Манайхаас 200 сая гаруй төгрөгийн эх үүсвэр олж, зуслангийн бүсэд хувийн хэвшлийн 3 компанийн хог тээврийн 9 машин гаргаж, хог ачих давтамжийг нэмсэн” гэлээ.

Энэхүү 25 машиныг Бадрангуй-Орших ХХК нийлүүлжээ. Бадрангуй-Орших ХХК нь Улсын харцага Бямбажавынх гэнэ. Нэг үе үндэсний бөхөөр барилдаж, олныг шуугиулж явсан харцага Баямбажав бизнест “шуугиулан” явж, Улаанбаатар хотын хогны машин нийлүүлэх хамаг тендерт шалгардаг болсон гэнэ.

 Өнгөрсөн жил ЗТХЯ-наас зарласан Улаанбаатар-Хөшигтийн хөндий чиглэлийн хурдны замын засвар, арчлалтад зориулсан машин механизм худалдан авах тендерт ялж 15 машин нийлүүлсэн аж.  Үнийн дүн нь 898,850,000 төгрөг буюу худалч хүнд тэрбум төгрөг дөхжээ.

Тэрчлэн чингэлэг тээврийн чирэгч машин 2 ширхэг 578,900,000 төгрөгөөр УБТЗ-д нийлүүлсэн амжилттай. Налайх дүүрэгт  Хог тээврийн автомашин худалдан авах 94 саяын тендерт шалгарчээ.  Нийслэлийн Баянзүрх дүүрэгт 519,000,000 сая төгрөгийн хог тээвэрлэх машин нийлүүлсэн. Хан-Уул дүүрэгт 400 сая шахам, Баянгол дүүрэгт 145,000,000 төгрөгийн тендерт шалгарчээ. Хот тохижилтын тусгай зориулалтын автомашин, техник хэрэгсэл, машин механизмын тендерт ялж 4 тэрбум 380 саяын машин нийлүүлсэн байна.  Таван Толгой түлш компанид 12 тэрбум 240 саяын машин техник нийлүүлсэн гэнэ. Бадрангуй Орших ХХК нь БНХАУ-ын хүнд даацын автомашин үйлдвэрлэгч FOTON брэнд мөн уул уурхай, зам барилга ХАА-н машин механизм үйлдвэрлэгч LOVOL брэндийн Монгол Улс дахь албан ёсны дистрибьютерээр ажилладаг.