Өнгөрсөн оны 12-р сарын 30-нд Ухань хотын 34 настай эмч Ли Веньлян WeChat  дахь анагаахын их сургууль төгсөгчдийн группэд  хотын далайн бүтээгдэхүүний захын худалдан авагчид дундаас SARS-тай төстэй өвчин илэрч, халдвар авагчдийг эмнэлэгт тусгаарласан тухай мэдээ оруулжээ. Мөн шинжилгээний хариугаар үл мэдэгдэх өвчнийг үүсгэгч вирус нь корона төрлийн том бүлгээс эхтэй, SARS-тай төстэй хурц зовиур илэрдэг болохыг бусадтайгаа хуваалцсан байна. Ли Веньлян хувийн шугмаар хамаатан садан, найз нөхөд ойр тойрныхондоо мэдэгдэж шинэ төрлийн өвчнөөс сэргийлэхийг анхааруулжээ. Хэдхэн цагийн дотор түүний мэдээлэл олон хандалт авч цахимаар таржээ. Энэ тухайд Ухань хотын Эрүүл мэндийн газар ч мэджээ.  Уг газраас далайн гаралтай бүтээгдэхүүн зардаг захаас үл мэдэгдэх өвчний халдвар илэрсэн талаар хотын эмнэлгүүдэд нууц анхааруулга хүргэсэн байна. Үүний хамт мэдээллийг чандлан нууцлахыг эмнэлгийн дарга удирдлага болон бүх эмч нарт сануулсан. 12-р сарын 31-нд хотын Эрүүл мэндийн газарт нууц шуурхай зөвлөгөөн болжээ. Энэ үеэр Ли Веньляныг дуудаж  үл мэдэгдэх өвчний талаар мэдсэн тухайд нь тайлбар авчээ. Харин он гараад 1-р сарын 3-нд түүнийг цагдаагаас дуудаж цахим орчинд хуурамч мэдээлэл тарааж улмаар иргэдийг айдас түгшүүрт автуулсан  хэмээн зөрчлийн хэрэг нээжээ. Хуулийн хариуцлага хүлээхгүй тулд эмч Ли буруугаа хүлээж ахин хуурамч мэдээлэл цацаж олон нийтийг үймээн сандраанд түлхэхгүй гэсэн амлалт бичгээр гаргаж өгсөн байна. 2-р сарын 3-нд Ли эмчээс өөрөөс нь шинэ төрлийн өвчний шинж тэмдэг илэрч шинжилгээгээр халдвар авсан нь тогтоогджээ. Ийнхүү эрх баригчид бодит байдлыг олон нийтэд зарлахаас өөр аргагүйд хүрсэн аж. Болсон явдал Хятадын хатуу хяналтат төр засгийн тогтолцооноос болж аюулт өвчнийг цаг тухайд нь сэрэмжлүүлээгүйгээс хугацаа алдсаныг нотолжээ.

https://edition.cnn.com/2020/02/03/asia/coronavirus-doctor-whistle-blower-intl-hnk/index.html