Дундговь аймгийн Гурвансайхан сум "Жишиг сум" болж буй. Жишиг сумын "Жишиг хот айл" бий. Энэ бол Дундговь аймгийн Гурвансайхан сумын Дэрсэнэ-Усны багийн малчин Доржийн Батбаатарынх. Тэднийх "Голын цагаан"-ын өвөлжөөнд намраараа налайтал өвөлжиж ажил үйлдвэрлэлээ эрхэлж байна. Аймгийн төвд ажиллаж амьдарч байгаад 1993 онд хөдөөг зорьж малчин болсон энэ гэр бүл 1000 хол давсан мал сүрэгтэй, аймаг, сумын аварга малчин. Тэднийх Салхитын орд руу татсан 35 киловольтын шугамнаас хүчдэл буулган дэд өртөө байгуулснаар өвөлжөө, хаваржаа, намаржаа, зуслангаа ах дүү, хамаатан садан дөрвөн өрх 24 цагийн цахилгаан эрчим хүчээр хангагдсан. Тэрчлэн 380 вольтоор арьс нэхий боловсруулах үйлдвэрийн машин механизм, тоног төхөөрөмж ажиллуулаад эхэлчихсэн, эхний бүтээгдэхүүнээ гаргаад эхэлчихжээ. Эднийх өвөлжөөндөө 10х8 метрийн хэмжээтэй хоёр өрөө сайхан сууц барьж /бохир, цэвэр усны дотоод систем бүхий/ хот орны тохилог сууцан дахь айл өрхтэй ижил нөхцөлд амьдарч байгааг харж болно. Энэ өрхийг эрчим хүчээр ханган "Жишиг малчин өрх" болгох "Говийн цагаан" төслийг тус сумын уугуул, эрчим хүчний туршлагатай инженер Л.Магнайбаяр боловсруулж гүйцэтгэсэн бол арьс нэхий боловсруулах үйлдвэрийн эцсийн бүтээгдэүүн гаргахад ШУТИС-ийн харьяа Хөнгөн үйлдвэрийн судалгаа, хөгжлийн хүрээлэнгийн эрдэм шинжилгээний ажилтан Цэрэннадмид зөвлөх багшаар ажиллаж гэрийн эзэгтэй Р.Цогзолмаа тус хүрээлэнд сургалтанд хамрагдан үйлдвэрлэлээ эрхэлж байна. Бас 3 га талбайг услах услалтын системийн тоног төхөөрөмжтэй, өвөлжөөндөө царгас, шар будаа тариалж туршаад дээжийг хурааж авч байна.