Улаанбаатарын захирагч, Улсын аварга П.Сумъяабазар тэргүүтэй удирдлагууд ТҮЦ буулгах, тоосгон гаражийг нүүлгэх ажилдаа үнэнхүү гаршсан. Хашаа нэгдсэн арга хэмжээ авч, нийслэлийн мод, төмөр, тоосгон хашааг "бульдозер" шиг буулгаж байгаа. Хүүхдийн паркийн хашааг хүртэл хүч түрэн буулгасан. Гэтэл эсрэгээрээ Үндэсний цэцэрлэгт хүрээлэнг хашаалахаар болжээ. Ингэхдээ 4,7 тэрбум зарцуулна гэнэ. Ямар хашааг нь буулгаад, ямар газрыг нь эргээд шорон шиг хашаажуулах гээд байдаг юм бэ? Эсрэгээрээ мөнгө "идэх" арга хэмээн эсэргүүцэж байна. 

Үндэсний цэцэрлэгт хүрээлэнг үеийн үед эмэгтэйчүүд удирдаж ирсэн. УИХ-ын гишүүн Б.Саранчимэг анхны дарга. Улаан шороо бужигнасан уудам газрыг цэцэгт ногоон тал болгосон гавьяатай. Тиймээс "Эко" хатагтай нэр аваа биз ээ. Ардчилсан засгийн үед ҮЦХ-гийн даргаар томилогдсон Д.Алтанцэцэг хатагтай ч намчирхаж, улстөржилгүй аятайхан авч ирсэн. Араас нь "Нарантуул" захын эзэн Б.Сайхансамбуугийн охин С.Эрдэнэтуул ҮЦХ-г удирдсан. Баян айлын ганц охин гэхэд эвдрээгүй, элдэв аашгүй, Оксфорд төгссөн хүн арай л өөр юм аа гэж иргэд ам сайтай байсан. Угаасаа ҮЦХ-гийн ажил олны нүдэнд ил байдаг. ҮЦХ-гээр ороход хуурай шороотой Улаанбаатараас өөр орчин, чийг дааж, ургамал ногоо үнэртсэн, хаа сайгүй ногоон хувцастай хүмүүс ажилладаг, ургамал ногоо үнэртсэн Улаанбаатарын ганц "уушги тэтгэгч" газар байлаа. Байлаа гэхийн учир ч бий. С.Эрдэнэтуулыг "ҮЦХ-г хүрээлэнг "Нарантуул" зах болголоо гэж нам дотроосоо шүүмжилсээр авч "хаясан".

   Оронд нь Үнэнбатын Оюунзул гэгч ногоон торгон дээлээр гоёсон ганган хүүхэн ирлээ. Намын үй олон хүүхнүүдээс шилэгдэж ирсэн хүүхэн ажиллах гэж үзүүлээд өгөх байлгүй гэтэл байдаггүй, таг...Үндэсний цэцэрлэгт хүрээлэнгийн усалгаа арчилгаа илт дутаж, зуны сард дотроо хуурай шороо пургиж үзэгдэх боллоо. "Нарантуул" захаасаа олон шахуу хоолны цэг, хүүхдийн хужаа тоглоомон машин байсаар байна. Хамгийн харамсалтай нь 21 цаг өнгөрөөгөөд тас харанхуй, гэрэлгүй. Хуучин өдөр шиг гэрэлтэй байсныг иргэд санаж яваа байлгүй. Тэгсэн мөртлөө харанхуйд хүүхдүүд унадаг дугуйтай давхилдаж байна. Хоорондоо мөргөлдөх аюултай. Эрт харанхуйлдаг ҮЦХ-гийн булан тохойд хүчингийн хэрэг гарахыг үгүйсгэхгүй ч аюултай байдал үзэгдэх боллоо. Гэр хороолол шиг харанхуй ч хүүхэд багачуудын дуу 22 цаг хүртэл тасрахгүй байгаа хойно...Ү.Оюунзул бүсгүйн хийсэн хамгийн том "бүтээн байгуулалт" нь KFC хэмээх "хоолны мангас"-т ҮЦХ-гийн газраас томоохон газар тасдан өгч хашаалуулах шив. Улаанбаатарын өнцөг булан бүрээс KFC олоод иргэд шарсан тахиа идчихнэ. Харин ургамал ногоо үнэртсэн, ус чийг дааг даасан цэцэрлэгт хүрээлэнг олохуйяа нэн бэрх шүү...