Өнгөрсөн оны 10 дугаар сарын 11-нд МҮОХ-ны ерөнхийлөгч Б.Баттүшиг эхнэр Н.Цэлмүүний хамт Парисын олимпийн наадмын бэлтгэл ажлын хүрээнд Парист ажиллах үеэр дээрэмдүүлсэн хэрэг гарсан. Гэмт этгээдүүд Б.Баттүшиг, Н.Цэлмүүн хоёрыг Шарль-де-Голл нисэх онгоцны буудлаас хотын төв рүү явж байх замд Олимпийн хөнгөн атлетикийн тэмцээн болох “Стад де Франс” цэнгэлдэх хүрээлэнгийн ойролцоо нүхэн гарцад түгжрэлд саатаж байх үед дээрэмдсэн байна. Ингэхдээ скүүтэр унасан хоёр залуу машины арын цонхыг хагалж, эмэгтэйн цүнхийг булаан авч, гурав дахь гэмт хэрэгтэн нь нисэх онгоцны буудлаас эхлэн Монгол хосыг машинтайгаа дагаж хэргийн хамсаатнууддаа мэдээлэл өгч байсныг цагдаагийн байгууллага тогтоожээ.

Хохирогчид 600 мянган евро буюу 650 мянган ам.долларын үнэтэй үнэт эдлэл, тус бүр нь 165 мянган еврогийн үнэтэй ээмэг бөгж, очир алмааз зэргээ хулгайд алдсан гэж мэдэгдсэн. Хэрэгт холбогдсон этгээдүүд нь 23-25 насны эрэгтэйчүүд байжээ. Удалгүй гэмт этгээдүүд баригдсан.