Энэ явдал Баянгол дүүргийн 16-р хороонд орших “МаксМолл” худалдааны төвийн гадна талын зогсоолд болжээ. Цагдаагийн камерийн бичлэгт үзлэг хийсэн тэмдэглэлд “...2020 оны 1 дүгээр сарын 3-ны өдрийн 12 цаг 34 минут 40 секундэд тамхи зуусан эрэгтэй хойд талын дугуй хэсэг рүү доошоо тонгойж байгаа харагдаж байна. 2020 оны 1 дүгээр сарын 3-ны өдрийн 12 цаг 34 минутаас 12 цаг 55 секундэд  хар куртиктай тамхи зуусан эрэгтэй тойроод нөгөө талын хойд талын дугуй руу тонгойж байгаа хэсгийг харуулав. ...2020 оны 1 дүгээр сарын 3-ны өдрийн 12 цаг 35 минут 12 цаг 36 минут хүртэл хар куртиктай тамхи зуусан эрэгтэй ямар нэгэн эд зүйл халаасандаа хийгээд цааш явж байгаа хэсгийг харуулав..." гэжээ.  Уг  эрэгтэй болох яллагдагч  Ч.А нь  барилгын ........ компанийн захирал агаад Алтангадас одонгоор шагнуулсан. Харин хохирогч эмэгтэй нь  “7..- 4..” дугаартай “ланд-200” машины эзэн аж. Хэрэгтэн нь болсон явдлын тухайд  “2020 оны 1 дүгээр сарын 3-ны өдөр Баянгол дүүргийн нутаг дэвсгэрт байрлах Макс молл худалдааны төвийн гадна компанийхаа дансыг шалгах гээд явж байтал  Д-гийн  .... гэсэн улсын дугаартай улаан өнгийн Ланд 200 загварын автомашин зогсож байхаар нь хутгаар урд болон хойд талын дугуйг нэг нэг удаа хатгасан. Миний  дугуйг хагалсан шалтгаан бол би тэр эмэгтэйтэй  2 жил орчим нууц амрагийн холбоотой байсан. Тэгээд болъё гэж хэлээд уулзахаа больсон чинь намайг удаа дараа утсаар дарамтлаад сүүлдээ манай эхнэр лүү танай нөхөртэй 1 жил 6 сар явалдсан гэж ярьсан.  Надаас 1.000.000 төгрөг нэхэхээр  нь 600.000 төгрөгийг өгсөн. Мөнгө нэхсэн болон  манай эхнэр рүү залгасанд нь уур хүрээд дугуйг нь хагалсан...” гэжээ.  Харин хохирогч камерийн бичлэгийг үзээд дугуй хагалагчийг “зүс таних хүн байна” гэжээ.