УИХ 2021 оны төсвийн төслийг хэлэлцэж байна. Төсвийн тухай хуулийн 29.4-т "Хөрөнгө оруулалтын төсөвт техник, эдийн засгийн үндэслэл хийгдсэн, зураг төсвөө батлуулсан, хуульд заасан бусад зөвшөөрөл олгогдсон төсөл, арга хэмжээг тусгана" гэж заасан байдаг. Гэтэл Засгийн газар 2021 оны төсвийн төслийг УИХ-д оруулж ирэхдээ зураг төсвийг нь батлуулаагүй, буюу төлөвлөлтийн шаардлага хангаагүй 55 барилгын төсөлд хөрөнгө оруулалт хийхээр тусгажээ. Үндэсний аудитын газар 2021 оны төсвийн төсөлд хийсэн дүгнэлтдээ Төсвийн тухай хуулийн дээрх заалтыг зөрчиж зураг төсөвгүй төслүүдэд хөрөнгө оруулалт хийхээр төлөвлөснийг онцолсон байна. Энэ нь ямар учиртайг Сангийн сайд Ч.Хүрэлбаатар дараах байдлаар тайлбарласан ч Үндэсний аудитын газар түүний тайлбарыг няцаасан юм.
Ч.Хүрэлбаатар: -Аудитын дүгнэлтэд дурдсан хөрөнгө оруулалтын 55 төслийн тухайд хоёр тайлбар хийе. Нэгдүгээрт, сургууль, цэцэрлэгийн барилгууд жишиг зураг төсөвтэй байдаг. Тэгэхээр барих гэж байгаа бүх барилгад зураг төсөв хийгээд байх шаардлагагүй. Жишиг зураг төсвөөр хийгддэг. Ийм төслүүд энэ 55 гэдэгт орж байгаа. Хоёрдугаарт, 2020 оны сонгуулийн дараа 2021 оны төсөв боловсруулагдаж эхэлсэн учраас зарим барилга байгууламжийн зураг төсөв хийгдэх цаг хугацаа байсангүй. Тухайн орон нутгийн удирдлагууд болон гишүүдээс нь хүсэлт ирсний дагуу төсвийн төсөлд тусгасан.
ҮАГ-ын тэргүүлэх аудитор С.Оюунгэрэл: -Зураг төсөвгүй 55 төсөл арга хэмжээнд жишиг зураг төсвөөр баригдах барилга байгууламжууд багтаагүй. Хэрэв үүнийг оруулсан бол нэлээд өндөр тоо гарах байсан. Харин бид Сангийн яамны Хөрөнгө оруулалтын газрын мэргэжилтнүүдтэй тулгаад жишиг зураг төсвөөр хийгдэхийг нь хасаж тооцсон. Харин зураг төсөв нь тусгайлан боловсруулагдах ёстой боловч хийгдээгүй барилга байгууламжийн тоог гаргахад 55 байсан юм. Тухайлбал, Байгаль орчин, аялал жуулчлалын сайдын багцад байгаа хоёр тэрбум төгрөгийн өртөгтэй, үүнээс 2021 онд 200 сая төгрөгийн хөрөнгө оруулалт хийхээр төлөвлөсөн "Соёмбо" цэцэрлэгт хүрээлэнгийн төсөл нь зураг төсөвгүй байна. Мөн Хүнс, хөдөө аж ахуй, хөнгөн үйлдвэрийн сайдын багцад нийтдээ 5.4 тэрбум төгрөгөөр санхүүжих дүнтэй, зургаан барилга байгууламж нь зураг төсөвгүй.
