Өдгөө энэ хэрэг хоёр жил гаруй хуулийн байгууллагад шалгагдаж хавтаст хэргийн материал нь хэдэн зуун хуудас болсон гэнэ. Технологийн сургууль нь Эрдэнэт үйлдвэрийн  дэргэдэх, ШУТИС-ийн харьяа, Ш.Отгонбилэгийн нэрэмжит гэсэн урт гуншинтай. Тус сургуулийн захирлаар байсан С.Д-гийн үед буюу 2017 оны намар сонгон шалгаруулалт зарлалгүйгээр 100 гаруй сая төгрөгийн худалдан авалт хийжээ. Хуулийн байгууллагийн тогтоосноор “Эрдэнэт”-ийн Холбоо мэдээллийн технологийн автоматжуулалтын цехийн холбооны инженер Г.Г-аар дамжуулан түүний төрсөн дүү Г.У-н “Эй Си И Икс” гэдэг компаниас 20,2 сая төгрөгийн бараа материал авчээ. Үүний хажуугаар Технологийн сургуулийн сүлжээний мэргэжилтэн Б.Б-гээр дамжуулан түүний эхнэр Ж.Н-ийн “ТННХ” компаниас 25,5 саяын сүлжээний тоног төхөөрөмж авсан. Эцэст нь “ВSВ люкс мебель” ХХК-ны худалдааны зөвлөх Э.Т-р зуучлуулан түүний найз Б.Б-н “Амжилтын нар” компаниас  57.2 саяын тавилга, эд хогшил тус тус шууд худалдан авчээ. Харин захирал С.Д нь эрх мэдэл, албан тушаалаа ашиглан дээрхи хүмүүст давуу байдал олгосон хэмээн буруутгагдсан.