Шилэн дансны мэдээллийн утгыг алдуулж байгаа газрын нэг нь ОБЕГ болжээ. Хэдийгээр мэдээлэл нь харагддаг ч олон мэдээллийг нууцын зэрэгтэй оруулж шилэн бус болгосон байна. Тэрхүү мэдээллүүд нь доод тал нь 30 саяас дээш хэмжээтэй гүйлгээнүүд агаад бүгд хувцас хэрэглэлүүд атал бүр маш нууцын зэрэглэлд олны хараа хяналтаас нуужээ. Үүнд “ЧАЭТ трэйд” компаниас худалдан авсан 99 сая төгрөгний өртөгтэй давууны, 81,7 саяын гал сөнөөгчийн, 82 саяын мөн гал сөнөөгчийн, 126 сая төгрөгний өртөгтэй тусгай зориулалтын гутлын гүйлгээг чандлан нуусан байна. Гал сөнөөгчдөө тусгай хувцас хэрэглэлээр хангасанаа нуухын учир ойлгомжгүй. Харин ч олон нийтэд сурталчилж мэдээлмээр ажил. Тэгвэл ОБЕГ-д мөнгөний хэмжээ өндөр байх тусам гүйлгээний мэдээлэл нууцлагддаг бичигдээгүй хуультай бололтой. Гэтэл Шилэн дансны хуулийг нууцлах биш л мэдээлэх, олон нийтийн хяналтанд оруулах л гэж баталсан. Бас нэг сонирхолтой гүйлгээ байгаа нь “Жинс чулуу” компаниас 37 саяар каракуль хонины арьс худалдаж авчээ. Жирийн аврагчид энэ хонины арьс ямар хэрэгтэй юм бол ... Бодвол дарга нарын хувцасанд л ордог байх. Цар тахлын дэгдэлтийн энэ үед хамгийн шилэн байх ёстой газрын нэг нь ОБЕГ гэдэг нь хэнд ч ойлгомжтой юм.
