Манай улс гамшгийн зэргээ нэмэгдүүлж бүх нийтийн бэлэн байдлын зэрэгт шилжээд байна. Энэ хүрээнд олон төрийн байгууллагын үйл ажиллагааг түр хугацаанд зогсоод байна. 

Тодруулбал, Шүүхийн ерөнхий зөвлөлөөс цар тахлын нөхцөл байдалтай холбогдуулан анхан болон давж заалдах шатны шүүх хуралдаануудыг хойшлуулж, хэрэг нэхэмжлэл, өргөдөл, гомдол, хүсэлтийг хүлээн авах ажиллагаанд тодорхой хязгаарлалт тогтоогоод байгаа юм. 

Тэгвэл улс төрийн хилс хэргээр шүүгдсэн, анхан шатны шүүхээс хорих ял сонссон гэдэг Ерөнхий сайд асан С.Баяр, ТЕГ-ын дарга асан Б.Ариунсан, “Петровис”-ийн Ч.Давааням нарын бие муудаж, давж заалдах шатны шүүх хуралдааныг яаралтай цахимаар хийх хүсэлтээ гаргасан гэх мэдээлэл байна. 

Учир нь анхан шатны шүүхээс 5 жилийн хорих ял сонсож, өдгөө ШШГЕГ-ийн харьяа 409 дүгээр ангид хоригдож байгаа С.Баярын тулай өвчин нь хүндэрсэн, бие нь муу байгаа гэх мэдээлэл байна. Харин 2 жилийн ял сонсоод байгаа “Петровис”-ийн Ч.Давааням хорт хавдартай бөгөөд, тэрээр ШШГЕГ-ийн харьяа 461 дүгээр хорих ангид, чийгтэй орчинд хоригдож байгаа нь өвчин хүндрэх нөхцөл бүрдсэн. Мөн түүний бизнесийн хамтрагч “Петровис”-ийн Ж.Оюунгэрэл саяхан таалал төгссөн явдалд тэрээр нэлээдгүй сэтгэлээр унасан талаар эх сурвалжууд мэдээлжээ. 

Мөн анхан шатны шүүхээс 1 жил 6 сар хоригдох ял сонссон Татварын Ерөнхий газар /ТЕГ/-ын дарга асан Б.Ариунсангийн чихэрийн шижин өвчин хүндэрсэн тул өмгөөлөгч нь Давж заалдах шатны шүүхийг цахимаар яаралтай хийж өгөх нь үү гэсэн хүсэлт гаргаад байгаа ажээ. Учир нь түүнийг Татварын байгууллагын удирдах албан тушаалд ажиллаж байхдаа “Оюутолгой” ХХК-ийн улсад төлөх татварын хэмжээг үндэслэлгүйгээр бууруулсан гэж буруутгасан билээ.