Америкийн Орегон мужийн Пирсон Тон эхнэртэйгээ таарахаа байж салж магадгүй болсон тул зөвлөгөө авахаар сэтгэлзүйч Рональд Розенд ханджээ. Хөөрхий эр гэр бүлийн доторхи харилцаа нь муудсаны улмаас сэтгэл санааны хямралд орсон зэргээ үнэнээр тоочжээ. Харин сэтгэлзүйч түүнд эхнэрийнхээ дургүйг хүргэдэг бүхнийг зоригтойгоор хийж харилцаандаа шинэ уур амьсгал оруулахыг зөвлөсөн байна. Ингээд Пирсон сэтгэлзүйчийн зөвөлгөөг дагаад эцэст нь эхнэртэйгээ бүр тангараг тасарчээ. Аргаа мухардахдаа сэтгэлзүйчдээ эргэлзэж эмчилгээнийх нь арга барилыг сэжиглэж эхэлжээ. Сэжиг таамаг ч зөв болж энэ хооронд өөдгүй сэтгэлзүйч эхнэртэй нь янаг амраг болоод амжсаныг олж мэджээ. Сэтгэлзүйч эхнэрийг нь өөртөө татахын тулд зориуд харилцааг нь муутгах зөвлөгөө өгч байсан нь тодорхой болжээ. Эхнэр нь нэгэнт өөр хүнтэй болсон тул Пирсон салах өргөдөл гаргахаас өөр аргагүй болсон. Гэхдээ хорон санаат сэтгэлзүйчээс өшөө авахаар шийдэж эхнэртэй нь бүр гэрлэж амжсан Рональдыг шүүхэд өгчээ. Ингэхдээ сэтгэлзүйчийг эмчийн ёс зүйн журмыг зөрчин үйлчлүүлэгчдээ зориуд санаатайгаар буруу зөвлөгөө өгсөний улмаас сэтгэл санааны том хохирол учруулсан хэмээн нөхөн төлбөрийн 2,9 сая доллар нэхсэн. Сэтгэлзүйчээр 30 жил ажиллахдаа нэг ч удаа үйлчлүүлэгчдээс нь гомдол гарч байгаагүй Рональд эхэндээ тоогоогүй ч байдал өдгөө өөрөөр эргээд байна. Шүүх энэ сарын 16 –нд нэхэмжлэгчийн өргөдлийг хүлээн авч түүний эсрэг хэрэг нээжээ.
