Цагаан ордны Үндэсний аюулүй байдлын зөвлөлийн ажилтан, генерал Александр Видман нь украйн үндэстэн агаад Киевд төржээ. Америк иргэншилтэй, Цагаан ордон дахь Украйны асуудлаархи тэргүүн зэргийн мэргэжилтэн хэмээн үнэлэгддэг. Украйн гаралт энэ генерал л Америкийн ерөнхийлөгч Дональд Трамп, Украйны ерөнхийлөгч Владимир Зеленский нарын утсан ярианы мэдээлэл алдагдсан болохыг албаны шугамаар урьдчилан анхааруулж байсан гэдгээр дээд удирдлагадаа үнэлэгдээд байна. Түүнийг Украйнд, ялангуяа цэргийн салбарынхан нь сайн мэддэг, хүндэлдэг агаад энэ хугацаанд Батлан хамгаалах яамны сайдын албан тушаалыг бүр гурвантаа санал болгожээ. Энэ тухай генерал Конгрессын танхимын тагнуулын асуудал эрхэлсэн тусгай комиссын хуралд оролцохдоо мэдэгдсэн байна. Генералыг ерөнхийлөгч Владимир Зеленскийн тангараг өргөх ёслолд оролцох Америкийн төлөөлөгчдийн бүрэлдэхүүнд орж Киевд очиход анх удаа санал тавьжээ. Саналыг Украйны Үндэсний аюулгүй байдлын зөвлөлийн нарийн бичгийн дарга Александр Данилюк тавьжээ. Түүнээс хойш тэрээр уг саналаар гурвантаа хандсан ч тэр бүрт нь татгалзсан хариу өгч иржээ. Мөн гадаад орны төрийн өндөр дээд албан тушаалтны тавьсан саналын талаар тухай бүрд нь Америкийн ТЕГ-д бичгээр мэдэгдэж байсан гэнэ. Украйнчууд чухам яагаад ийм санал байнга тавих болсон нь украйн гаралт генералд ойлгомжгүй байдаг аж. Харин татгалзсан шалтгааны тухайд тэрээр өөрийгөө америк хүн гэж үздэг тул өөр улсын зэвсэгт хүчинд зүтгэх нь зохимжгүй хэрэг гэж шийджээ.
