Төрийн болон ТББ-уудын үйл ажиллагаа хэрхэн холилдон хутгалдаж байгаагийн жишээ БХБЯ-нд гарчээ. Тус яам өнгөрсөн онын 7-р сард “Эрхэм инээмсэглэл” ТББ-аар таван сая төгрөгний ажил үйлчилгээ гүйцэтгэсэн байна. Шилэн дансанд нь гүйлгээний ерөнхий утгаас өөр мэдээлэл алга. Тус ТББ нь уруул тагнайн төрөлхийн эмгэгтэй хүүхдүүд болон тэдний гэр бүлд туслан зөвлөх чиглэлээр үйл ажиллагааг явуулдаг байна. Үүнээс харахад үйл ажиллагааны зорилго чиглэл нь ажил тэнгэр газар шиг зөрөөтэй атал яам таван сая төгрөгний ажил гүйцэтгүүлсэн аж.  ЭМЯ-ны шилэн дансанд ийм мэдээлэл байвал ойлгож болно.  Харин барилгын яаманд гэхээр яагаад ч санаанд буухгүй юм. Иймэрхүү явдал УИХ-ын гишүүдээс эхтэй. Гишүүд туслах, зөвлөх нарынхаа байгуулсан ТББ-уудаар дамжуулан элдэв төсөл хөтөлбөр нэрээр их хэмжээний мөнгө авдаг нь улам бүр ил болж байгаа билээ.