Монгол дахь цар тахлын дэгдэлтийн нэг содон зүйл нь бүх шатны дарга нарын “албаны” хувцасны гангараа юм. УОК, НОК-ийн гишүүдээс эхлээд сайд, хотын дарга болон Засаг дарга нар гээд сэтэртэй болгон десант хувцас малгайгаар жигдрэх болсон. Үүнээс дээд шатныхан нь үнэтэй каракуль малгай, захаар гангарч байгааг НОК-оос харж болно. Тус комисс өнгөрсөн онын 12-р сард гишүүдийнхээ хувцаслалтанд 31 гаруй сая төгрөг зарцуулжээ. Үүнээс дарга буюу каракуль малгайд таван сая, мөн каракуль захад 3,6 сая төгрөг зарцуулсан байна. Бүх гишүүддээ нэг бүр нь 165 мянган төгрөгний гутал тарааж үүнд 5,2 сая төгрөг заржээ. Дараа нь ахин 18 сая төгрөгийг “НОК-ын гишүүдийн хувцасны зардалд” хэмээн шилжүүлсэн байна.