ОХУ-ын хүүхдийн инээдмийн теле цуврал "Ералаш"-ийн уран сайхны удирдагч, найруулагч Борис Грачевский коронавирусийн улмаас 72 насандаа таалал төгсчээ.
Грачевский арванхоёрдугаар сарын сүүлээр эмнэлэгт хэвтсэн байна. Тухайн үед найруулагч ТАСС агентлагт "Би эмнэлэгт хүчилтөрөгч, дусал залгуулаад, зохих ёсоор эмчилгээ хийлгээд хэвтэж байна" хэмээн ярьж байжээ.
Борис Грачевский 1969 онд С.А.Герасимовын нэрэмжит Бүх Оросын кино урлагийн дээд сургуульд элссэн ч 23 жилийн дараа төгссөн байна. Тэрбээр Горькийн нэрэмжит кино студид ажиллаж байсан аж.
1974 онд зохиолч Александр Хмеликтэй хамтран хүүхдийн инээдмийн "Ералаш" цувралыг бүтээж, захирал, уран сайхны удирдагчаар ажилласан байна. Тэрбээр 1974-1984 онд "Ералаш"-ийн захирлаар, 1984 оноос уран сайхны удирдагчаар ажиллаж эхэлжээ.
"1990-ээд оны хүнд хэцүү цаг үед ч Грачевский "Ералаш"-ийг "чирж" явсан. "Ералаш" зөвхөн хүүхдэд зориулсан кино биш. Тэр цувралд би ч тоглож байлаа, ер нь бүх жүжигчид тоглосон доо" хэмээн жүжигчин Леонид Ярмольник хэлсэн байна.
Тус цувралын хөгжмийг зохиосон хөгжмийн зохиолч Алексей Рыбников "Киноны эхлэл хөгжим түүнтэй хамт Горькийн кино студид ажиллаж байх үеийн залуу сайхан, аз жаргалтай цагийг үргэлж санагдуулдаг" гэжээ.
Борис Грачевский нь 2016 онд гурав дахь эхнэр болох 37 настай жүжигчин, дуучин Екатерина Белоцерковскаятай гэр бүл болсон бөгөөд тэд дундаасаа есөн сартай хүүтэй юм байна. Тэрбээр дөрвөн хүүхэдтэй ба 49 настай хүү, 42 болон есөн настай хоёр охинтой юм байна.
Эх сурвалж: ВВС
