Залуу найруулагч Ц.Дэнсмаа Япон улсын Токио хотноо болсон "Цүрүкава" Залуу уран бүтээлчдийн богино хэмжээний Кино их наадмаас “Аргал” киногоороо тусгай шагнал хүртлээ. Энэ наадамд 92 бүтээлээс 24 кино шалгарч сүүлийн шатанд өрсөлдөн, тусгай шагнал хүртсэн юм. Тус наадмын гол шүүгч найруулагч Когава Казуяа “Би урьд өмнө нь дэлгэцээр монголын нүүдэлчний амьдрал, тал нутаг, хөдөө дүр зургийг бишгүй олон харж байсан ч ийм бодит зураглал, реалист дүр төрхийг анх удаа харж байна. Богино хэмжээний баримтат киноны хувьд өндрөөр үнэлж болохуйц бүтээл гэж хэлж болно” гэжээ. Бас шүүгчдийн нэгэн болох найруулагч Кёохара “Кино хийнэ гэдэг сансар огторгуйн ертөнцөөр аялж байна гэсэн үг” гэсэн байна. Дараа жил бас "сансар ертөнцөөр аялж", монголын залуу уран бүтээлчид киногоо өрсөлдүүлэх боломжтой болжээ.
