Азийн бөхийн холбооны шинэхэн генсек, Монголын чөлөөт бөхийн холбооны гадаад харилцаа, Казахстаныг зорьсон багийн ахлагч П. Буяндэлгэр үүрэгт ажлаа аваад Ази тивийн аварга шалгаруулах тэмцээн тэр дундаа эмэгтэйчүүдийн 55 кгын жингийн аварга болсон " Налайх"- ын М. Дөлгөөнд шагнал гардууллаа. Ази тивийн аварга шалгаруулах тэмцээнд 2017 онд Энэтхэгт болоход Монгол Улсын хөдөлмөрийн баатар, гавьяат тамирчин С. Батцэцэгийг тивийн аварга болоход Дэлхийн бөхийн холбооны сургагч багш, гавьяат дасгалжуулагч Б. Батбаяр мөн шагнал гардуулж байсан түүхэн мөч санаанд буулаа. Чөлөөт бөхийн шигшээ баг маань өнгөтэй, өөдтэйхэн сайхан байнаа, Алматыд. Олимпийн эрх олгох тэмцээнд эмэгтэй 50, 53, 57, 75 эрхээ авчихлаа. Эрэгтэйчүүд 125 кгд мөн авлаа. Үргэлжүүлээд шар тивийн аварга шалгаруулах тэмцээний эрэгтэй сонгомол бөхийн барилдаанд " Алдар" спорт хороо, гавьяат дасгалжуулагч Ц. Хосбаяр багшийн шавь М. Даваабанди маань ганц дайчин ганцаардахгүй гэж эзэн орныг өвдөг шороодуулж, Иранд өвдөг шороодлоо. Түүнийг магтах, бахархах ёстой санагддаг.
Сүүлийн жилүүдэд Монголоо тээгээд үзэж байгаа хүн нь манай М. Даваабанди байгаа юм. За үргэлжлээд өнөөдөр Азийн тэнгэрт 55 кгд Хүүхдийн олимпийн наадмын дэд байр, " Налайх"-ын М. Дөлгөөн алтан медаль хүртэж тивийн иж бүрэн медальтай боллоо. Багшид нь халуун баяр хүргэе. Мөн энэ өдөр барилдсан Э. Дэлгэрмаа, Б. Шоовдор мөнгөн медаль хүртсэн нь чамлахааргүй амжилт юмаа. Маргааш барилдах охиддоо амжилт хүсч байна. Эрчүүд ч Монгол Улсын гавьяат тамирчин П. Өнөрбат Э. Бэхбаяр тэргүүтэй шилдгүүд залгамж халаа болсон дүү нараа дагуулсаар бүтэн багаараа Азид, олимпийн эрхийн тэмцээнд залгуулан өрсөлдөнө. Энэ ташрамд Монголын чөлөөт бөхийн холбооны ерөнхийлөгчийн үүрэг гүйцэтгэгч П. Гансүх, нарийн бичгийн дарга Б. Батбаяр болон холбооны ажилчдад тэмцээн дуусхаас урьтаад баярлалаа гэж хэлье. Урьд өмнө харагдаж байгаагүй 40 гаруй хүний бүрэлдэхүүнтэй багийг 3 том тэмцээн, бэлтгэлд хамруулж хилийн чанадад илгээлээ. Хөрөнгө санхүү, сэтгэл юугаан зориулж амжилт гардаг жамтай. Өө тийм чөлөөт бөхийн холбоо 60 жилийн ойгоо энэ онд угтана. Тэд үүний бэлтгэл ажлыг ч завсардуулахгүй сэтгэл зүрхээ зориулж яваа.
А.ТАМИР
