Эрх баригчид социализмын үе шиг ард иргэдийг “гэрэлт сайхан” ирээдүйгээр угжин тайвшруулах аргадаа эргэн оржээ. Саяхнаас цахимд гэнэтхэн “Ковидгүй зун” хэмээн давлагаалах болсон. УОК, НОК-ийн авч байгаа арга хэмжээний ачаар 6-р сарын 1 гэхэд аюулт өвчнийг бүрэн ял ард иргэд нийтээрээ хөдөө гадаа аялж, хот хүрээгүй наадамлаж цэнгэлийн дээдийг эдлэх гэнэ. Гэсэн ч вакцин татан авалтад гарсан саатал, өвчлөлийн буурахгүй байгаа өндөр үзүүлэлт, нас баралтын их тооноос харахад энэ зундаа ковидаас салахгүй нь тодорхой боллоо. Дээр нь эрх баригчид вакцины талаар зөрүүтэй мэдээлэл цацаж, олон төрлийн вакцин зэрэг оруулж ирсэнээс иргэд тодорхой нэг вакуин хийлгэхээр хүлээж саатах зэргээр дархлаажуулалтын хурд огцом саарсан.   Ковидын  тэлэлт, түүнээс үүдсэн айдас улам нэмэгдэж байгаа энэ үед эрх баригчид олон нийтийг сатааруулах олон арга хэмжээ авч эхэлжээ. Үүний нэг нь Д.Сумьяабазарын 2020-2024 оны төлөвлөгөөт ажлын нэг болох “Хотын соёл” аян агаад аянд нийтдээ 358 сая төгрөг зарцуулах болсон цар тахлын энэ хүнд үед асар их мөнгө бөгөөд цаг үеэ олоогүй ажил гэхэд болно.  Аян нь “Ковидгүй зун” уриан дор явагдаад эхэлжээ. Гэтэл өдгөө хотын соёлыг дэлгэрүүлэхэд бус харин ковидтой тэмцэхэд, иргэдээ дэмжихэд энэ хөрөнгийг зарцуулах ёстой баймаар. Төсвийн задаргаад зааснаар хотын соёлд уриалах нэг минутын 50 контент хийхэд л 75 сая төгрөг зарцуулах юм байна. Үүний оронд  цаг үеэ мэдрээд дархлаажуулалтанд хамрагдахыг уриалсан контент хийвэл илүү үр дүнтэй. “Ковидгүй зуны төлөө хамтдаа” долоон цуврал нэвтрүүлэг хийхэд бас л их хэмээний хөрөнгө болох 70 саяыг зарцуулахаар болжээ. Энэ мэтээр зөвхөн видео контентийн зардалд 244 сая төгрөг үрээд эхэлсэн.  Хотын дарга Д.Сумьяабазар саяхан “хотын хөгжлийг хараад яана даа” хэмээн харуусдагаа хэлсэн.  Харин иргэд энэхүү цар тахлын хүнд үед  “Хотын соёл” , “Ковидгүй зуны төлөө” аянд зарцуулах их мөнгийг хараад “яана даа” гэж хэлмээр болж байна. УИХ-ын гишүүн Н.Ганнибал  өнгөрсөн нэг жилд төр засгаас ковид-19 цар тахлын эсрэг хийсэн “нүсэр” тэмцлээс “Хатан ээж” дуу, Ерөнхий сайд асан У.Хүрэлсүх, ЭМ-ийн сайд асан Д.Сарангэрэл, ХӨСҮТ-ийн захирал Д.Нямхүү нарыг бүхнийг ялагч комикс баатрын дүрээр зурсан хүүхдийн зураг л үлдсэн гэж онож хэлсэн. Тэгвэл 358 сая төгрөгний өртөгтэй “Ковидгүй зуны төлөө” уриат аянаас Нийслэлийн Соёл урлагийн газрын дарга Ж.Дамдинцэрэнгийн хийлгүүлсэн хэдэн видео контент л үлдэх байх даа.  Энэ их хөрөнгийг үр ашиггүй зарцуулаад дуусахаас өмнө аянг зогсоох хэрэгтэй.