Я.Санжмятав: Ард түмнээс сонгогдсон Ерөнхийлөгчийн бүрэн эрхэнд халдсан явдал боллоо

Байнгын хороодын зүгээс гаргасан Монгол Улсын Ерөнхийлөгчийн сонгуулийн тухай хуульд өөрчлөлт оруулах тухай хуульд бүхэлд нь тавьсан Монгол Улсын Ерөнхийлөгчийн хоригийг хүлээн авах боломжгүй гэсэн дүгнэлтийг дэмжих эсэх талаар санал хураалт явуулахад гишүүдийн дийлэнх дэмжлээ.

Ингэснээр Монгол Улсын Ерөнхийлөгчийн тухай хуульд өөрчлөлт оруулах тухай хууль хүчин төгөлдөр үлдлээ.

Монгол Улсын Ерөнхийлөгчийн зөвлөх Я.Санжмятав: Үнэнийг хэлэхэд, их хурал хариуцлага хүлээх ёстой. Ерөнхийлөгчийн бүрэн эрхэд халдсан. Ард түмнээс сонгогдсон Ерөнхийлөгчид халдсан халдлага учраас хариуцлага хүлээх ёстой юм шүү. Тав хоногийн хугацаанд тавьсан хоригийг наймнаас дүгнэлт хийсэн биз дээ. Үүнд дүгнэлт хийгээрэй.

Би парламентад гурван удаа сонгогдсон хүний хувьд МАН яаж тоглодгийг мэднэ. Хажуудаа байгаа сөрөг хүчнээ тоохгүй, ард түмнээ хүлээж авахгүй, ҮХЦ хоёр хуваачихсан, Дээд шүүхээрээ тоглочихсон байгаа чинь үнэн. 2024 оны сонгуулийн дараа та нар цусаар уйлсан ч нөхөгдөхгүй эмгэнэлтэй алхмуудыг хийж байгаагаа анхаараачээ. Тиймээс алдаагаа богино хугацаанд засаач гэж бид нар орж ирээд байна. МАН 100 жилийн ойгоо гурван өндөрлөгтэйгээ тэмдэглэдэг л байгаа биз. Харин 100 жилээр ч нөхөхгүй эмгэнэлийн асуудалд хүч түрчихээд байна. Их хүчиндээд өндрөөс унах эвгүй шүү.

Монгол Улсын Ерөнхийлөгчийн Тамгын газрын дарга Ө.Шижир: УИХ Ерөнхийлөгчийн хориг тавих хугацааг үл хэрэгсэж, хуулийг шууд хэрэгжүүлж эхэлсэн анхны тохиолдол гэж үзэж болохоор байна. Ерөнхийлөгчийн сонгуулиар хэн сонгогдох, сонгогдохгүй байх нь 77 дахь асуудал. Гэхдээ сонгуулийн легитим чанарыг хадгалж үлдэх ёстой. Ерөнхийлөгчийн сонгуулийн тухай хуулийн 81.1 дэх заалтад сонгуулиас нэг жилийн өмнө өөрчлөхийг хориглоно гэсэн заалт байгаа Ерөнхийлөгчийн хориг тавих тавхан хоногийн хугацааг УИХ хүлээх ёстой. Тавхан хоног хэрэгждэг хууль байж болохгүй.

Монгол Улсын Ерөнхийлөгчийн зөвлөх Л.Болд: Үндсэн хуульд заасан Ерөнхийлөгчийн хориг тавих эрхийг үг, үсгийн тоглоом болгож байна. Ядаж хуулийнхаа хугацаа, процедурыг зөв болгочих. Хуулийг гууль болгоод явах юм бол маш осолтой.

Сэтгэгдэл

Анхаар! Уншигчдын бичсэн сэтгэгдэлд http://alim.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.