АН-ыг засаг барьж байхад гааль, татварын газрыг нэгтгэсэн Гааль, татварын ерөнхий газрыг даргалдаг С.Пүрэв гэж том дарга байсан. Тэрээр өмнө нь Сангийн сайд Б.Болорын зөвлөх, дэд сайдаар ажиллаж байгаад шинээр байгуулагдсан ГТЕГ-ын даргаар томилогдсон. “Гангар инвест” гэдэг барилгын том компанитай. 2018 оны намар экс даргын эхнэр, бэр, жолооч нар Орос руу гараад Алтанбулаг боомтоор буцаж орж иржээ. Экс даргынхан “Amway” брендийн 3кг-ын угаалгын нунтаг 4ширхэг, оо, саван, агяа таваг угаадаг бодистой орж иржээ. Жолооч Д.Батмөнх гаальчинтай уулзахаар ороод гарч ирэхдээ “хориглосон бараа бүтээгдэхүүн тул хурааж авна гээд мөнгө нэхсэн, мөнгө аваад шууд халаасандаа хийсэн” гэж бусаддаа хэлжээ. Ингээд татвар авсан ч татварын хуудас өгөөгүй гэх хэрэг манджээ. Удалгүй ГЕГ-ын Зөрчлийн албанаас гаальчин луу ярьж “та нэг даргын найзых нь машиныг шалгасан юм байна, тэгээд дарга руу ярьсан байна, дарга уурлаад байна” гэжээ. Албан ёсоор гомдол ирсэн эсэхийг асуухад ирээгүй гэжээ. Гэтэл 2019 он гараад гаалийн байцаагчийг АТГ-аас дууджээ. Улмаар прокуророос эрүүгийн хэрэг үүсгэн шүүхэд шилжүүлжээ. С.Пүрэв захирлын жолооч Д.Батмөнх нь ГЕГ-ын 1281 утсанд ярьсан ярианы бичлэгт “яг хэдэн төгрөг өгсөн, авсан” талаар яригдаагүй байхад Сахилгын хороо нь шууд хэрэг үүсгэн АТГ руу шилжүүлсэн байжээ. Д.Батмөнх нь гаальчинд 80.000, 180.000 төгрөг өгсөн хэмээн удаа дараа зөрүүтэй мэдүүлэг өгчээ. Мөн гарын үсэг зурах ёсгүй цагаан хуудсан дээр гарын үсэг зурсан хэмээн зохиомол мэдүүлэг өгчээ. Болсон явдлын талаар экс даргын эхнэр, бэр болон бас нэг жолооч нь мөн л өөр хоорондоо зөрүүтэй мэдүүлэг өгчээ. ГЕГ-ын Зөрчлийн хороо нь хэргийг шийдэхдээ дүрэм журмаа зөрчсөн нь тогтоогджээ. Ингээд шүүхээс гаальчинд холбогдох хэргийг хэрэгсэхгүй болгож гэм буруугүйд тооцож цагаатгасан байна. Экс даргын талынхан гаальчинг “чи яасан их том юм, даргын урдаас сөрдөг юм, чамайг АТГ-ын манаач болгоно” гэж занасан гэх агаад бараг хэлсэндээ хүрэх дөхжээ. Ийнхүү экс том даргаас “болж” ажлаа дүрэм, журмын дагуу гүйцэтгэсэн төрийн албан хаагч ноцтойгоор хэлмэгдэх шахжээ.
