УДЭТ-ын жүжигчин, СТА Б.Нармандах Монгол Улсын гавьяат жүжигчин болно. Монгол Улсын Ерөнхийлөгч Х.Баттулга Төрийн ордонд төрийн дээд одон медаль гардуулна. Үүнд жүжигчин Б.Нармандах багтсан байгаа юм байна. 

Хүн бүрийн сэтгэлд хоногшсон “Унаган хайр” дууг тэрбээр оюутан ахуй үедээ дуулсан гэдэг. Түүний анхны уран бүтээлүүдийнх нь нэг, өөрийнх нь нэрийн хуудас болсон “Унаган хайр”-ыг амилуулсан. Урлагийн наадамд оролцож буй оюутан Б.Нармандахын хоолойны цар хүрээ, дуулах авьяасыг олж харсан МУГЗ, хөгжмийн зохиолч Г.Алтанхуяг энэ дууны аяыг түүнд зориулж зохиосон байна. Харин шүлгийг нь дууны яруу найргийн хаан гэгддэг яруу найрагч Л.Дагвадорж хайртай бүсгүйдээ зориулж бичжээ. Б.Нармандах гэх авьяаслаг уран бүтээлч Монголын урлагийн салбарт 1980 оны сүүл, 1990 оны эхээр хүч түрэн орж ирж, дууны болоод, тайз дэлгэцийн даацтай уран бүтээлүүдээр од болон гялалзаж явсан өдгөө ч гялалзсаар явна. Ийнхүү бүтээсэн олон дүртэй, урлагийн замд тод гэрэлтэж яваа түүний хөдөлмөрийг төр өндрөөр үнэлэх нь.