Ерөнхийлөгчийн сонгуульд Зөв хүн электорат эвслээс нэр дэвшигч Д.Энхбат болон түүний гэргий, эмч, хамгаалалтын ажилтны шинжилгээний хариу эерэг гарч коронавирусийн халдвар авсан нь батлагдсан тул өчигдөр Улсын хоёрдугаар төв эмнэлэгт тусгаарлагдсан билээ. Энэ үеэр нэр дэвшигч Д.Энхбатын мэдээллийн дараа ХҮН-ын дарга, УИХ-ын гишүүн Т.Доржханд тэргүүтэй намын удирдлагууд сэтгүүлчдийн асуултад хариулт өгөв.
Тэрээр "Би Ерөнхийлөгчийн сонгуульд нэр дэвшигч Д.Энхбатын сонгуулийн ерөнхий менежерээр ажиллаж байгаа. Халдвар хамгааллын дэглэмээ сахиад, орон нутагт нэр дэвшигчтэйгээ явсан. Тавдугаар сарын 4-ний орой PCR шинжилгээ өгсөн, 5-ны 10.00 цагийн байдлаар шинжилгээ хариу сөрөг гэсэн хариу ирсэн. Манай багийнхан бүгд шинжилгээ өгсөн, хариу сөрөг гарсан. Гагцхүү нэр дэвшигч болон гэргий, машинд нь хамт явсан эмч, хамгаалалтын ажилтнууд халдвар авсан байна.
Монгол Улсад ковидын халдвар маш өндөр байгааг энэ нөхцөл байдал харууллаа. Ерөнхийлөгчийн сонгуульд гурван хүн нэр дэвшиж байхад нэг нь халдвар авчихлаа. Тиймээс ХҮН-ын удирдлагууд, Зөв хүн электорат эвслийнхэн хуралдаж шийдвэрээ гаргалаа.
Өнөөдөр монголчуудад халдварын эрсдэл маш өндөр байгаа энэ үед иргэдийг олноор нь цуглуулж уулзалт хийдгээ зогсооё гэж МАН, АН-ынханд уриалж байна. ХҮН-ээс өчигдрөөс эхлэн яваагүй үлдсэн гурван аймаг болон Улаанбаатарт товлосон бүх уулзалтаа өчигдрөөс эхлэн цуцаллаа. Сонгуулийн сурталчилгаа дуусахад үлдсэн гурав хоногт уузалт, хэлэлцүүлгээ цахимаар хийе гэж бусад нэр дэвшигчдэдээ уриалж байна. 6-р сарын 7-ны 15.00 цагт эхлэх мэтгэлцээнийг цахимаар хийе.
Сүүлийн 3-4 хоногт Сүхбаатарын талбайд маш олон хүн цуглаж, одон медаль аваад хүмүүс баярлаж байна. Ковидын тархалт ийм өндөр байх үед Монгол Улсын эрхэм Ерөнхийлөгч өө, олон хүн цуглуулж одон медаль тараахаа боль оо. Заавал тараах бол Төрийн ордонд олон хүн цуглуулахгүйгээр өөрөө иргэддээ очоод өг л дөө. Ерөнхийлөгч олон нийтийн бөөгнөрөл үүсгэхгүйгээр одон медалиар шагнах эрхтэй. Бүгдээрээ эв нэгдэлтэйгээр онлайнаар сурталчилгаа хийж, төрийн сонгуулиа явуулъя гэж уриалмаар байна" гэлээ.
