Дэлхийн Шатрын Холбооноос 7-р сарын 11-ний өдрөөс 8-р сарын 8-ны өдрийн хооронд ОХУ-ын Сочи хотноо Дэлхийн цом 2021, Эмэгтэйчүүдийн Дэлхийн цом 2021 өндөр зэрэглэлийн тэмцээнүүдийг зохион байгуулж байна. Хоёр жилд нэг удаа зохион байгуулагддаг тус тэмцээнд дэлхийн 100 гаруй орны зөвхөн шилдэг гэсэн шатарчид тэр дундаа Дэлхийн цом 2021-д 206, Эмэгтэйчүүдийн Дэлхийн цом 2021-д 103 шилдэг шатарчин Дэлхийн өнцөг булан бүрээс оролцоно.

Зөвхөн өндөр зэрэглэлийн шатарчид оролцдог дэлхийн хэмжээний томоохон тэмцээнд Монгол улсаа төлөөлөн Дэлхийн цом 2021-д Их мастер Д.Батсүрэн, ОУМ С.Ган-Эрдэнэ, Эмэгтэйчүүдийн Дэлхийн цом 2021-д Их мастер Б.Мөнгөнтуул, ОУМ Т.Мөнхзул нарын 4-н шилдэг шатарчид оролцож байгаа нь Монголын шатрын түүхийн хуудаснаа алтан үсгээр бичигдэх амжилт.

 Дэлхийн шатрын холбооноос дэлхийн шилдэг 39 орны шатрын холбоодод эрэгтэй, эмэгтэй тус бүр 1 шатарчин нэр дэвшүүлэх эрхийн дагуу Монголын шатрын холбооноос 6-р сарын 4-6-ны өдрүүдэд сонгон шалгаруулах тэмцээнийг зохион байгуулж эрэгтэй ангилалд Их мастер Д.Батсүрэн, эмэгтэй ангилалд ОУМ Т.Мөнхзул үндэсний ялагчаар шалгарч эх орноо төлөөлөн оролцох эрх, Ази тивийн аварга шалгаруулах хайбрид тэмцээнээс ОУМ С.Ган-Эрдэнэ 8р байрт шалгарсан амжилтаараа дэлхийн хэмжээний тэмцээнд улсынхаа далбааг 2 дахь удаагаа намируулах эрхээ бахархалтайгаар авсан бол 2019 оны Ази тивийн 3.3 бүсийн аварга шалгаруулах тэмцээний дэд аварга, Их мастер Б.Мөнгөнтуулын хувьд түүний амжилтыг үндэслэн ДШХ-ны Ерөнхийлөгчийн цагаан хуудсын урилгаар оролцох эрх авсан.

Өнөөдөр буюу 2021 оны 7-р сарын 12-ны өдрөөс эхлэн Улаанбаатарын цагаар 20:00 цагт эрэгтэй, эмэгтэй ангиллууд зэрэг эхний давааны үндсэн стандарт өргүүдээ тоглож эхлэх юм. Дэлхийн цом 2021-ийн гадаад чангаасаар эхний 50, Эмэгтэйчүүдийн Дэлхийн цом 2021-ийн гадаад чансаагаар эхний 25-д жагсаж буй шилдэг шатарчид эхний даваанд тоглохгүйгээр өнжиж байгаа бөгөөд 2-р даваанаас эхлэн хүч үзнэ. Тэмцээний шагналын сангийн хувьд эхний давааг давахад л $3750 үнийн дүнг халааслах бөгөөд даваа давах бүрт $6000, $10,000, $16,000 гэсэн үнийн дүн үргэлжилсээр эрэгтэй ангиллын ялагч $110,000, эмэгтэй ангиллын ялагч $50,000 үнийн дүнг халааслан гэртээ харих юм.