Он солигдохын өмнөхөн буюу Арван хоёрдугаар сарын 30-ны өдөр Сэлэнгэ аймгийн Сант сумын 2-р баг Орхон голын орчимд Ланд круйзер 200 маркийн автомашин Улаанбаатараас Эрдэнэт орох замдаа гүйцэж түрүүлэх үйлдэл хийж эсрэг урсгалаас эгнээндээ орохдоо гүйцэж түрүүлсэн машинаа мөргөж далбилзахдаа эсрэг урсгалд чигээрээ явж байсан буруу талдаа жолооны хүрдтэй Toyota Voltz маркийн авто машиныг хүчтэй мөргөжээ. Улмаар мөргүүлсэн машины урд талын суудалд сууж явсан иргэн Г газар дээрээ нас барж, талийгчийн нөхөр нь буюу жолооч нь тархины хүнд гэмтэл авчээ.
Осол гаргасан Ланд круйзер-200 маркийн автомашин Эрдэнэт үйлдвэр ТӨҮГ-ын Ерөнхий захирал Х.Бадамсүрэнгийн Улаанбаатар хотод унадаг машин бөгөөд тус машинд Эрдэнэт үйлдвэр ТӨҮГ-ын Улаанбаатар дахь төлөөлөгчийн газрын дарга Б.Сэмжидмаа нөхөр жолоочийн хамт гурвуулаа зорчиж явсан гэнэ. Талийгаачийн нөхөр машиндаа хавчуулагдчихаад гарч чадахгүй хэдэнтээ ухаан алдаж сэргэхдээ “ирээд туслаач” гээд хашхираад байхад нэг ч хүн гарч ирж тусламж үзүүлээгүй байна. Сүүлд нь онцгой байдлынхан ирж машиныг нь тайрч хохирогчдыг гаргаж авчээ. Хөтөлийн цагдааг ирэхэд осол гаргасан авто машины хүмүүс хар хайрцгаа "эвдэрхий байсан" гэж тайлбарлажээ. Мөн цагдаад осол гаргасан авто машины арын суудалд сууж явсан Эрдэнэт үйлдвэр ТӨҮГ-ын Улаанбаатар дахь төлөөлөгчийн газрын дарга Б.Сэмжидмаа болон түүний нөхөр нар “Бид энэ жолоочийг танихгүй. Замын хүмүүс. Зүгээр дайгдаж явсан юм” гэжээ. Эх сурвалжуудын хэлж байгаагаар Эрдэнэт үйлдвэр ТӨҮГ-ын Улаанбаатар дахь төлөөлөгчийн газрын дарга Б.Сэмжидмаа нь нөхрийн хамтаар Эрдэнэт үйлдвэр ТӨҮГ-ын Ерөнхий захирлын шинэ жилийн үйл ажиллагаанд явж байсан гэх бөгөөд багагүй яарч байжээ. Сэмжидмаагийн нөхөр хуулийн байгууллагад нөлөө бүхий ажил хийдэг бололтой. Яарвал даарна гэж шинэ жилийн баярын өмнө Б.Сэмжидмаагийн сууж явсан машин осол гаргаж, нэг айл харууслын хар нулимсаар шинэ оноо угтаж үджээ.
Хохригчдын хувьд, осол гарах үед Улаанбаатар хотод байдаг хүүхдүүд дээрээ очиж шинэ он гаргахаар явж байсан бөгөөд Эрдэнэт хотын “100 айл” худалдааны төвд лангуу түрээслэж барилгын материалын бичил бизнес эрхэлдэг байжээ. Хамгийн харамсалтай нь осол гаргагчид нэг удаа жолоочоо явуулснаар өөрөөр өнөөдрийг хүртэл хохирогчийн ар гэрийнхэнтэй огт уулзаагүй аж.
