УИХ-ын гишүүн Г.Дамдинням 6 хүүхэдтэй, хамгийн олон хүүхэдтэй гишүүний 2-т жагсаж байна. УИХ-ын 76 гишүүн дотроос хамгийн залуу нь 1980 онд төрсөн Ерөнхий сайд Л.Оюун-Эрдэнэ, Г.Дамдинням хоёр. Ерөнхий сайд Л.Оюун-Эрдэнийг Бэрх тосгоны конторт юм юм хийж, “Шаарийбуу шиг” явахад Г.Дамдинням нийслэлд намынхаа залуучууд дотроо байр сууриа олчихсон догь залуу явлаа. Иргэний хөдөлгөөн 2005-2006 онд идэвхжиж, Ж.Батзандан, О.Магнай, Баасан эгч тэргүүтэй улс Сүхбаатарын талбай дээр “поошиг” нүдэж явсан. Харин Г.Дамдинням тухайн үеийн намын дарга Намбарын Энхбаярыг өмөөрч, хариу жагсаал хийн талбай дээр дарцаг шиг хийсэж явсан байдаг. Тэгж улаан дарцаг шиг хийсэж явахдаа БНХАУ-д ажиллаж байсан Онц бөгөөд Бүрэн Эрхэт Элчин сайд Д.Цахилгааны хүргэн болсон. Г.Дамдиннямын эхнэр нь нэг үе гадаад хэлний сургалттай, нийслэлийн 23 дугаар дунд сургуулийн захирал байсан Ц.Уянга. Д.Цахилгаан гуайн охин Ц.Уянга нэг үе ааштай, адтайгаараа шуугиулж явсан ч Г.Дамдинням гишүүний гэргий болоод нам гүм амьдрах болжээ.
Иргэний хөдөлгөөний Магнай, Батзандагийн эсрэг жагссаны хүний хариуд 2008-2009 онд Байгаль орчны сайдын зөвлөх, 2009-2010 онд БСШУ-ны сайд ЁС.Отгонбаярын зөвлөхөөр ажилласан. Мөн Ё.Отгонбаяр сайд Багшийн дээдийн Нийгэм судлалын ангийг төгссөн Г.Дамдиннямыг 30 настайд нь буюу 2010 онд ШУТИС-ийн Нийгмийн хөгжлийн проректороор тавьж, суга дэвшүүлсэн хүн. Харин өнгөрсөн 2020 онд Г.Дамдинням Дархан хотоос сонгогдон УИХ-ын гишүүн болсон товчхон намтартай. Энэ удаагийн УИХ-д 4 хүүхэдтэй гишүүн олон. Тухайлбал УИХ-ын гишүүн П.Анужин, Завханаас сонгогдсон Б.Баярсайхан хоёр хоёулаа Алдарт эхийн хоёрдугаар одонтой, дөрвөн хүүхдийн ээж. Тэгвэл УИХ-ын залуу гишүүн Г.Дамдиннямынх зургаан хүүхэдтэй. Отгон хүүхэд нь саяхан нэг ой хүрч, гэргий нь Алдарт эхийн нэгдүгээр одон Ерөнхийлөгчөөс авч, энгэртээ зүүлээ. Тэгэхээр автоматаар Г.Дамдинням гишүүн Алдарт эцэг гэсэн үг. Тэрчлэн 6 хүүхэдтэй Г.Дамдинням гишүүн хамгийн олон хүүхэдтэй гишүүн номинацид УИХ дотроо аман хүзүүдэж байна. Нэгдүгээр байрт хоёр эхнэрийн арав шахам хүүхэдтэй бие даагч Норовын Алтанхуяг гишүүн оржээ.
