Энэ жишээн дээр тохиох таарах үг олон. “Эхийг нь эцэээхгүй, тугалыг тураахгүй” эсвэл “хонь бүрэн чоно цатгалан” гэх мэт.  “Цатгалдсан” нь НАМОХ-ны ерөнхийлөгч асан, ГБХЗХГ-ын дарга Г.Батдорж, МЗХ-ны ерөнхийлөгч Г.Гэрэлт-Од, МОХ-ны ерөнхийлөгч Г.Сүхбат нар. Мэдээж үүн дээр “хүндэт” ерөнхийлөгч Д.Гантулга нэмэгдэнэ. ГБХЗХГ нь  МЗХ, МОХ-той хамтран ажиллах санамж байгуулжээ. Энэ санамж бичгийн хүрээнд хийгдэх ажлуудад нийтдээ 90 сая төгрөгийг төсвөөс гаргахаар болжээ.  Түрээсийн ихээхэн орлого олдог байртай МЗХ, МОХ нэг төгрөг ч гаргасангүй. 90 сая төгрөгийн тал илүү хувиар буюу 50 саяар нь баримтат кино, гэрэл зургийн үзэсгэлэн бас “залуус судлал” эрдэм шинжилгээний бага хурал хийж үрэхээр төлөвлөжээ. Зуун жилийн түүхтэй МЗХ баримтат кино хийх, үзэсгэлэн гаргах хэмжээний арвин баян архивтайн дээр одоо болтол залуусаа “судалж” дуусаагүй тул дээрхи  50 сая төгрөгийг дангаараа авчээ. Харин МОХ нь ямар зорилготой, юу хийгдэх, үр дүн нь тодорхойгүй 10 саяын өртөгтэй “Орлоготой оюутан”, 21 саяын “Ирээдүйгээ хамтран бүтээе” нөлөөллийн арга хэмжээ зэргийг авчээ. “Оюутан цаг” контент гаргахад зургаан сая төгрөгийн зарцуулах гэнэ. Саяхан Монголд залуучуудын байгууллага үүсэж хөгжсөний 100 жил ой тохиож энэ их “баяр”-аар МЗХ-ны ерөнхийлөгч О.Гэрэлт-Од, УИХ-ын гишүүн асан бөгөөд МЗХ-ны хүндэт ерөнхийлөгч Д.Гантулга нар бие биенээ одонгоор шагнуулж буй зураг цахимаар тарж олныг хөгжөөсөн.  Өөр нэгэн залуу хүн шагнуулсан зураг харагдаагүй. Тэгвэл энэхүү 90 сая төгрөг тэрхүү гялгар төмөр шиг л болсон гэхэд хилсдэхгүй. Нөгөөтэйгүүр МЗХ-ны зуун жилийн ой гээд том “баяр” айсуй. НАМОХ угшилтай Г.Батдорж төсвийн хөрөнгийг НАМЗХ угшилтай МЗХ-ны ах нартаа “сайхан баярлаарай” гээд өгч байгаа дүр зураг харагдаж байна. Ийнхүү бараг 100 гаруй сая төгрөг залуусд оюутанд нялзах тодорхой үр дүнгүйн дээр баримтат кино, контент, үзэсгэлэн, эрдэм шинжилгээний хурал энэ тэр гээд дуусах нь дээ ...