Бүр хүүгийх нь нүдэн дээр ээжийх нь биед гэмтэл учруулсан байна. Хүү нь салгахаар очиход хоолойг нь маажиж цамцны захаар нь боожээ. Хэрэг явдал гурван жилийн өмнөөс эхэлжээ. Монгол эмэгтэй нь “Шонхорын хүсэл”, “Их Мандуул” компанитай гэрээ байгуулж байр захиалан урьдчилгаагаа өгчээ. Өгсөн урьдчилгаа нь 30 гаруй сая төгрөг гэнэ. Гэтэл барилгын компанийхан урьдчилгааг нь авсан атлаа байрыг нь өөр хүнд заржээ. “Их Мандуул” компаний захирал Мөнх-Эрдэнэ нь “хятад захирал Вэй Шиэ Чүэнд урьдчилгааг шилжүүлсэн, түүнтэй уулз” гэдэг гэнэ. Мөнгөнийхөө араас хөөцөлдсөн ч хятад монгол захирлууд офисоо солиод зугтаагаад уулздаггүй байжээ. Хятад захиралтай нь азаар нэг удаа таарсан ч уулзахаас татгалзжээ. Хэрэг гардаг өдөр хятад захирлыг Улаанхуарангийн тэнд “Рэнжровэр” машинтайгаа явна гэсэн мэдээллийг “Их Мандуул” компаниас өгчээ. Монгол эмэгтэй араас очиж олдодгүй хятад захиралтай уулзаад “санхүү дээр чинь очиж тооцоо нийлье” гэхэд явахгүй гэжээ. Харин ч газар унагаж үсдээд гарыг нь мушгижээ. Хүү нь туслахаар ирэхэд мөн хоолойг нь боож хүзүүг нь маажсан гэнэ. Дуудлагаар ирсэн цагдаа нарын өөдөөс ч эсэргүүцсэн тул гавлаж авч явжээ. Цагдаад баригдсан хятад захирлаа авахаар “Шонхорын хүсэл” компаний менежер Цэнгэлмээ, барилгын инженер Жамсран, борлуулалын менежер Баска нар араас нь иржээ. “Их Мандуул”, “Шонхорын хүсэл” нь эртний “холбоотой”. 2016 онд “Баянзүрх дүүргийн Онцгой байд­лын хэлтсийн Аврах, гал унтраах 63 дугаар ангийн хашаанд онцгой байд­лын алба хаагчдад зориулан “Онцгой хотхон” нэртэй 512 айлын орон сууц “Их мандуул” компаниар бариулахаар гэрээ байгуулж байсан. “Их Мандуул” нь гүйцэтгэгчээр “Шонхорын хүсэл” компанийг сонгосон. Тухайн үед  Онцгой байдлын алба хаагчид хуруу хумсаа хуйхлан, өр шир тавьж байгаад урьд­чилгаа мөнгөө өгсөн байдаг. Онцгойнхон байрандаа орно хэмээн хүлээж байх зуур  “Их мандуул”-ынхан барилгын ажлыг гүйцэтгэгч “Шонхорын хүсэл” компанийг залилан мэхэлсэн байж болзошгүй нөхцөл байдал үүсэж, хуулийн байгууллагад хандсан хэрэг дэгдсэн. Онцгой байдлын албаны алба хаагчдад хотхоны ам метр тал­байн үнийг 1.1 сая төгрөгөөр тооцон гэрээ байгуулсан аж.  Харин “Их мандуул” нь гүйцэтгэгчтэйгээ ам метр талбайг 800 мянган төгрөгөөр тооцсон гэдэг. Сүүлдээ онцгойнхон эрх ашгаа хамгаалахаар Түр хороо байгуулан тэмцэж байсан.