Жижиг дунд үйлдвэрийг хөгжүүлэх сангийн зээлнээс УИХ-ын гишүүд аав ээждээ, ах дүүгийнхээ хамаарал бүхий компанид авсан нь илэрч, УИХ-ын гишүүд, төрийн өндөр албан тушаалтнуудын хувьд ёс зүйгүй явдал болж байна. УИХ-ын гишүүд ЖДҮХС-гийн авсан нь МАН-ын бүлгийн 65 бүлгийн гишүүн гэнэтхэн бөөнөөрөө дээгүүрээ хуваагаад авчихсан биш, анхнаасаа арын хаалгаар явж ирсэн тухай яригдаж эхэллээ. ЖДҮХС-гийн зээлнээс авсан явдлыг энэ оноос биш бүр урагшлуулан эхнээс нь шалга гэж ард иргэд шаардаж байгаа. Юутай ч усны эх нь булингартай бол адаг нь булингартай гэдэг болжээ. Тэр тусмаа 2008-2012 онд ХХААХҮ-ийн сайд Т.Бадамжунай, тус яамны Төрийн нарийн бичгийн дарга асан Т.Гантулга нартай холбоотой асуудал цөөнгүй гарчээ. Тухайлбал, ХХААХҮЯ-наас 2009 онд зарласан тариа хураалтын комбайн нийлүүлэх тендер гэхэд л 36 комбайны нэг бүрийг нь 147 сая төгрөгөөр үнэлсэн байдаг. Тэр комбайныг Хятадаас нэг бүрийг нь 89 сая төгрөгөөр оруулаад ирэх боломжтой гэж бизнесмэнүүд хэлдэг.
Тухайн үеийн Төрийн нарийн бичгийн дарга Т.Гантулгыг Гацууртын Чинбаттай нэг нутгийнх, хүргэн Бат-Эрдэнэтэй нь найз гэдэг. Тухайн үеийн Т.Гантулга Төрийн нарийн бичгийн дарга 2010 онд үрийн зориулалттай савны тендер зохион байгуулсан байдаг. Нэг тэрбум 800 сая төгрөгийг төсөвт өртөгтэй “Үрийн зориулалттай босоо төмөр агуулах” худалдаж авах тендер зарлаж, зургаан компани оролцсоноос “Би Би И” ХХК нэг 1.6 тэрбум, “Дорнод гурил” ХХК нэг тэрбум 790 сая, “Өлзий төв” ХХК 1.8 тэрбум, “Төмөр транс” ХХК 1.9 тэрбум, “М-Ти-Эс” ХХК нэг тэрбум 815 сая, “Гацуурт” ХХК нэг тэрбум 866 сая төгрөгийн үнийн санал тус,тус ирүүлсэн байжээ. Эндээс харахад “Гацуурт” болон хамгийн бага үнийн саналтай компанийн хооронд 267 сая төгрөгийн үнийн зөрүү гарсан байдаг. Гэтэл хамгийн өндөр үнийн санал өгсөн нутаг нэгт “Гацуурт”-ын Л.Чинбатад эрхийг нь өгчихсөн гэдэг. 2013 онд Тариалан эрхлэлтийг дэмжих сангийн санхүүд Үндэсний аудитын газрынхан шалгалт хийсэн. Тус сангийн удирдлагууд, яамны Төрийн нарийн бичгийн дарга нар 2009 оноос сангийн мөнгө шамшигдуулсан хэрэгт холбогдож, шалгуулж байсан. Ч.Пэрэнлэй Тариалан эрхлэлтийг дэмжих сангийн захирлаар ажиллаж байхдаа 350 сая төгрөгийг хувийн компанидаа зувчуулсан хэргээр Улсын мөрдөн байцаах газар, Эрүүгийн цагдаагийн газар, АТГ-т шалгуулсан. Ч.Пэрэнлэй нь Тариалан эрхлэлтийг дэмжих сангийн Сэлэнгэ аймаг дахь эрхлэгч Доржханд, Хөтөл дэх эрхлэгч Ч.Гантулга нартай хуйвалдан энэ хэргийг үйлдсэн гэж яригддаг. Ч.Пэрэнлэй нарыг “Атрын III” аяны хөрөнгөөс 260 сая төгрөг шамшигдуулсан гэж үзээд яллах дүгнэлт үйлдэж прокурорт шилжүүлсэн ч хэргийг тодорхойгүй шалтгаанаар хэрэгсэхгүй болгосон гэдэг.
Тус сангийн дараагийн захирал мөн л санхүүгийн асуудалд нэр холбогдсон. Дүйнхэржав даргыг Төрийн нарийн бичгийн даргаар ажиллаж байсан Т.Гантулгатай хамт Япон улсаас буцалтгүй тусламжаар олгосон 9.5 мянган тонн хүнсний цагаан будааг борлуулсан мөнгө болох 12 тэрбум төгрөгийг зориулалтын бусаар зарцуулсан гэж шалгаж байв. ЖДҮХС-гийн асуудал босож, сайд асан Т.Бадамжунай УАЗ 469 машинд суугаад, Хятадаар дамжин, Сингапурт очсон гэдэг. Харин Төрийн нарийн бичгийн дарга асан Т.Гантулга нь Эрчим хүчний дэд сайдаар ажиллаж байгаа. Хадгаламжиндаа 2тэрбум 967 сая 113 мянган төгрөгтэй, 400000 саяын үнэт эдлэл, Лексус 570, бенз машинтай гэж мэдүүлснийг харсан иргэд баян буянтайг нь гайхаж байна.
