Э.Цэндбаатар өмнө нь бусдыг зодсон хэрэгт удаа дараа торгуулийн ялаар шийтгүүлж байжээ
ДАШТ-ий хүрэл медальт, Азийн хошой аварга, Азийн наадмын аварга, Гавьяат тамирчин Э.Цэндбаатар сүүлийн үед олон нийтийн анхаарлын төвд ороод буй. Архидан согтуурч, сахилга батын зөрчил гаргасан асуудлаар шигшээ багаасаа хөөгдөж, дэлхийн дэвжээнд тоглох эрхээ хасуулаад байсан ч, тэрбээр олон түмнийхээ дэмжлэгээр дахин нэг боломжийг хүртсэн. Улмаар ирэх сарын 3-ны өдөр Эрдэнэт хотын Сэлэнгэ баазад болох сорил тэмцээнд “Алдар” спорт хорооны тамирчин О.Тулгатай өрсөлдөж, тэргүүлэх чин хүсэлтэй. Удахгүй болох сорил тэмцээн, цаашлаад дэлхийн дэвжээнд өрсөлдөхөөр зүтгэж буй тамирчин залуугийн дуулиан үүгээр дууссангүй. Д.Мөнх-Эрдэнэ санаачлан тамирчин залууг байр, машинтай болгох аянг эхлүүлж, 50 сая төгрөг өгөхөө мэдэгдсэн ч, тэр нь ч мөн хэл ам татлав.
Өнгөрсөн явдлуудын тухай нэгтгээд бичвэл нэг ийм дүрслэл бууна. Э.Цэндбаатарын хувьд үе үе зодооны болоод мансууруулах бодис хэрэглэсэн гэх асуудалд нэр холбогдсон ч, тухайн үедээ нэр цэвэрхэн мултраад гарчихдаг нь хачин. Өнгөрөгч оны арванхоёрдугаар сарын 10-ны орой тэрбээр “Олимпын гүүр”-ний урд авто замын хэсэгт нүцгэн алхаж, чанга дуугаар хашгирч байсан нь, мансуурсан байж болзошгүй гэх хардлагыг иргэдэд төрүүлсэн. Улмаар хар тамхитай тэмцэх хэлтсээс ажлын хэсэг гарч, түүний шээснээс шинжилгээ авсан ч хар тамхи илрээгүй гэх.
-ЦЕГ-ААС ТҮҮНИЙГ НЭГ Ч УДАА БАЙЦААЛТ ӨГЧ БАЙГААГҮЙ, ЗОДООНЫ ХЭРЭГТ ХОЛБОГДОЖ БАЙГААГҮЙ, НЭР ЦЭВЭР ХЭМЭЭЖ БАЙВ
Сүүлийн зодооны асуудал сөхөгдөх үеэр тэрбээр санаандгүй байдлаар бусдад хорлогдож, хар тамхитай уух зүйл уусан гэдгээ хэвлэлд өөрийн амаар хэлсэн. Түүнчлэн одоо ч СЭМҮТ-ийн тогтмол хяналтад байж, хар тамхины шинжилгээ өгдөг гэх. Гэвч түүний гэмт хэргийн бүртгэлд хар тамхитай холбоотой нэг ч кэйс байхгүй, хамгийн сүүлд зодуулсан гэх хэрэг нь ч ор мөргүй байх аж. Нэг ч удаа мэдүүлэг өгч, зодоон хийж байгаагүй гэх тамирчин залуу нь 2018 оны хавар Баянгол дүүргийн шүүхээс Эрүүгийн хуулийн 11.6.2 буюу “Хүний эрүүл мэндэд хөнгөн хохирол санаатай учруулах” хэрэгт холбогдсон ч, тухайн үедээ хэрэг нь хэрэгсэхгүй болж, цэвэрхэн мултарч байв.
Дараа жилийнх нь мөн үед буюу 2019 оны хавар Сүхбаатар дүүргийн шүүхээс Эрүүгийн хуулийн 11.4.1 буюу “Хүний эрүүл мэндэд хүндэвтэр хохирол санаатай учруулах” хэргээр буруутгагдаж, 700,000 төгрөгөөр торгуулаад өнгөрчээ. Гэвч тэрбээр засарсангүй.
Он гарснаар өнгөрөгч нэгдүгээр сард Чингэлтэй дүүргийн Эрүүгийн Хэргийн Анхан Шатны Шүүхээс түүнийг мөн л Эрүүгийн хуулийн 11.6.1 “Хүний эрүүл мэндэд хөнгөн хохирол санаатай учруулах” заалтыг зөрчсөн хэрэгт буруутгаж, дахин 700,000 төгрөгийн торгуулийн ялаар шийтгэж байжээ.
Харин өнгөрөгч гуравдугаар сард Хан-Уул дүүргийн Эрүүгийн Хэргийн Анхан Шатны Шүүхээс түүнийг мөн л Эрүүгийн хуулийн 11.6.1 буюу “Хүний эрүүл мэндэд хөнгөн хохирол санаатай учруулах” хэрэгт буруутган, 1,000,000 төгрөгийн торгох ялаар шийтгэсэн байдаг. Хамгийн сүүлд буюу өнгөрөгч зургаадугаар сард тэрбээр Орхон аймгийн сум дундын Эрүүгийн хэргийн анхан шатны шүүхээс Эрүүгийн хуулийн 11.6.1 “Хүний эрүүл мэндэд хөнгөн хохирол санаатай учруулах” хэргээр буруутгагдан дахин 700,000 төгрөгийн торгуулийн ялаар шийтгүүлж байсан аж.
Сэтгэгдэл
Анхаар! Уншигчдын бичсэн сэтгэгдэлд http://alim.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Төстэй мэдээ
