4,5 ТЭРБУМААР ҮНЭЛЭГДЭХ 5 ОРОН СУУЦТАЙ, 4 ТЭРБУМЫН АВЛАГАТАЙ ПРОКУРОР АЖЛАА ӨГЛӨӨ

Монголын хамгийн баян прокурор гэж албан бусаар нэрлэгддэг Сургалт, судалгааны төвийн хяналтын прокурор П.Эрдэнэбатыг өөрийнх нь хүсэлтээр албан тушаалаа өгөх гаргасан. Улсын ерөнхий прокурор Б.Жаргалсайхан тушаал гаргаж, Авлигатай тэмцэх газраас “үндэслэлгүйгээр хөрөнгөжсөн байж болзошгүй” үндэслэлээр шалгаж байгаа Сургалт, судалгааны төвийн хяналтын прокурор П.Эрдэнэбатыг өөрийнх нь хүсэлтээр албан тушаалаас  нь чөлөөлсөн байна. Прокурор П.Эрдэнэбатыг үндэслэлгүйгээр хөрөнгөжсөн тухай мэдээлэл хэвлэл мэдээллийн хэрэгслээр удаа дараа гарч байгаа бөгөөд хууль сахиулах байгууллагаас уг асуудлыг мөрдөн шалгаж байгаа тохиолдолд албан үүргээ хэрэгжүүлэх нь сонирхлын зөрчил үүсгэж болзошгүй гэж үзсэн тул ийнхүү шийдвэрлэжээ. Зарим нь Эрдэнэбат прокурорыг төрийн албанаас төрсөн од гэгддэг АТГ-ын хэлтсийн дарга асан Амарбаттай үй зайгүй найз, Говь-Алтай аймагт, Баянзүрх дүүрэгт ч ажиллаж байсан муугүй прокурор гэх юм билээ.  Хамгийн гол нь Эрдэнэбат прокурорын Авлигатай тэмцэх газарт гаргаж өгсөн Хөрөнгө орлогын мэдүүлэг олны анхаарлыг татдаг. П.Эрдэнэбат прокурорын хувьд хөрөнгө орлогоороо бусад прокурорууд болон хуулийн салбарынхныгаа манлайлдаг хур баян гэх юм билээ. Тухайлбал өнгөрөгч 2017 оны хөрөнгө орлогын мэдүүлэгтээ 4.5 тэрбумаар үнэлэгдэх 5 орон сууц, 5 үйлдвэрлэлийн барилга, 6 авто зогсоолтой. 164 сая төгрөгөөр үнэлэгдэх 5 автомашин, 173 сая төгрөгийн үнэ бүхий уран зураг, үнэт эдлэлтэй. Дансандаа 182 сая төгрөгний хадгаламжтай. Бусдаас 4 тэрбумын авлагатай гэж бичиж байжээ. Хөрөнгө орлогыг нарийвчлан үзвэл, нийтийн орон сууц, зуслангийн байр, хувийн орон сууц, хашаа байшин гээд нийт 5 орон сууцтай. Гэр, авто зогсоол, авто граж, өвөлжөө, хаваржаа, гүний худаг, хүлэмж гэх мэт зургаан барилга байгууламжтай, таван машинтай. Мал аж ахуйтай бөгөөд хурдан удмын адуутай гээ мэдүүлсэн нь яах аргагүй олны анхаарлыг татсан, татахаас ч аргагүй билээ.