Сүхбаатар дүүрэг дэх Мэргэжлийн хяналтын хэлтсийн дарга асан М.Баасандорж нь НМХГ-ын дарга Л.Эрдэнэчулуунтайгаа “дайн” зарлаад удсан. Энэ үеэр хэлтсийн дарга асангийн нэг сая төгрөгийн хахуулийн хэрэг дэгдсэн. М.Баасандоржид “Говь-Түшээ” компаний захирал М.Амарсайхан, компанийн нягтлан бодогч М.Чимгээ нар хахууль өгчээ. Нягтлан нь захирлаа “ер нь их шудрага хүн” гэж сайн талаас нь тодорхойлсон. Болсон явдлын тухайд өгүүлэхэд “Говь-Түшээ” нь 32-ын тойрогд “Бүрд” худалдааны төвийг компани, хувь хүмүүсд түрээслүүлдэг. НМХГ-ын даргын баталсан “Хүнсний худалдааны газруудад төлөвлөгөөт шалгалт хийх тухай” удирдамжийн дагуу Сүхбаатар дүүргийн мэрэгжлийн хяналтын хэлтсийнхэн шалгалтаар иржээ. Шалгалтаар бөөн дутагдал, зөрчил илэрсэн байна. Түрээслэгч “Монкек” компаний барааны дэлгүүрээс хугацаа дууссан торт, “Саран бууз” цайны газар газны хэрэглээний аюулгүй байдлын шаардлага хангаагүй, чихэр, жимс, худалдаалдагч Батхишиг нь хугацаа дууссан бүтээгдэхүүн зарсан, Ариунжаргалын нөхөр нь цагаан халаадгүй гэх мэт. “Бүрд” худалдааны төвийг хариуцдагийн хувьд нягтлан бодогч Чимгээ Сүхбаатар дүүргийн МХ-ын хэлтэст дуудагджээ. Хуулиар зөрчил гаргагч ААН-ийг өндөр, хувь хүнийг багаар торгодог тул “хувь хүнээр торгож өгөөч” гэж байцаагч Өлзийбаяраас хичээнгүйлэн гуйжээ. Байцаагч даргатай уулз гэхэд нягтлан бодогч таньдагийн хувьд М.Баасандоржийн өрөөнд оржээ. Дарга “Танайхаас олон зөрчил илэрсэн, зөрчлийг прокурор хянадаг. Хэрвээ прокурор руу тухайн асуудлыг явуулахгүйгээр энд нь түргэвчлээд шийдэж болно, гэхдээ надад мөнгө өгөөрэй, би зохицуулж болно “гэжээ. Ингээд “шалгалтыг түргэвчлүүлэх, шалгалтын дүн болох эрсдлийн үнэлгээг ашигтайгаар гаргуулах, мөн зөрчлийн хэргийг прокурорт шилжүүлэхгүйн” тулд М.Баасандоржийн данс руу нэг сая төгрөг шилжүүлэх болсон тухай захирал Амарсайхандаа яаралтай мэдэгдэж хийлгэсэн байна. Үүний дараа шинэ жилийн өмнөхөн М.Баасандорж ахин нягтлан бодогчтой холбогдож хэлтсийн баярын санхүүжилтийн” хандив” хүсжээ. Нягтлан мөн л захиралдаа дуулгаад мөнгө шилжүүлжээ. Энэ бүхнийг тэрээр “Бид дандаа л мэргэжлийн хяналтын хэлтэстэй харьцаж байгаа шүү дээ. Ямар нэгэн байдлаар цаашдаа асуудал үгүйсгэхгүйн тулд замаа л зассан” гэж хээвнэг мэдүүлсэн гэнэ. “Бүрд” худалдааны төвд Сүхбаатар дүүргийн МХ-ын хэлтсийн улсын байцаагч Г.Отгонцэцэг, Л.Ариунаа нар хяналт хийж зөрчлийг хялбаршуулсан журмаар шалган шийдвэрлэжээ. Байцаагч Д.Өлзийбаяр нь “Рашаантын хөндий” компанийг торгосон байна.
