Өнгөрөгч долоо  хоногт УИХ-ын гишүүн Ц.Тувааныг АН-ын бүлгийн дарга болох гэж байна гэх мэдээлэл хэвлэлээр цацагдаж эхэлсэн. Тэгвэл УИХ дахь Ардчилсан намын бүлгээс зарим гишүүнээ хасаж буйгаа мэдэгдлээ. Харин хасагдсан гэх гишүүн нь энэ асуудлыг фэйсбүүкээс мэдсэн бөгөөд намын гишүүн хэвээр байгаагаа хариу мэдэгдэв.

Тэрээр “Чуулган дээр байж байгаад хэвлэлээс мэдээлэл авлаа. Гайхаж байна. Хөөлөө, хөөлөө гээд одоо хэд ч хөөгдчихөв. Би намдаа байгаа. Бүлэг ажиллаад жил гаруй болж байна. Бүлгийн үйл ажиллагаа, дотоод зохион байгуулалтын асуудлыг АН-ын бүлгийн хуралдаан дээр ярьсан. Нөхөн сонгууль нэмэлт санал хураалтаар шийдэгдэх болсон учраас бүлгийн даргын асуудлыг долоо хоногоор хойшлуулсан. Үүнтэй холбоотой байх гэж бодож байна. Би АН-аас сонгогдсон гишүүн, АН-даа байгаа. Олон удаа хөөгдөж байна. Манай намын дүрмээр гишүүнийг хөөвөл Үндсэн дүрмийн хурлаар шийдвэр гаргадаг. Би сая Үндсэн дүрмийн хорооны даргатай ярьсан. Хурал болоогүй, намайг хөөгөөгүй гэсэн. Намайг хөөгөөд байгаа талд би байхгүй. Тэдний бүртгэлд байхгүй. Байхгүй хүнийг татаж авчраад хөөлөө гээд байх юм. Намаас хөөлөө гэдэг шийдвэрийг би 3-4 удаа сонсож байна. Байхгүй газраасаа хөөгдөж байгаагаа гайхаж байна” гэв.