Ятгах тусам нягтлаагүй нэгэн гарчээ.  “Эрдэнэсийн авдар” цэцэрлэгийн эрхлэгч талбайгаа өргөжүүлж хүүхдийнхээ тоог нэмэх санаатай явжээ. Өмнө цэцэрлэгийн гэрчилгээ гаргуулахаар нийслэлийн Боловсролын газарт хандсан ч шалгалтанд нь тэнцээгүй аж. Хэрвээ гэрчилгээгээ авсан бол улсаас сар бүр хоёр сая төгрөгийн санхүүжилт авах  байсан. Энэ үед  кино найруулагч мэргэжилтэй С.Э гэгч залуу гарч иржээ. Тэрээр өөрийгөө Тагнуулын ерөнхий газарт ажилладаг гэж итгүүлсэн байна. Мөн хотын боловсролын газрын орлогч дарга Дашдэмбэрэлтэй найз гээд гэрчилгээ гаргаж өгч чадна хэмээн төөрөгдүүлжээ. Тогтсон ханш дөрвөн сая төгрөг байдаг гэжээ. Үүнд нь итгэсэн цэцэрлэгийн эрхлэгч эмэгтэй хэлсэн мөнгийг нь цувуулан өгчээ. Гэрчилгээний урьдчилгаа хэмээн хоёр саяыг, галын болон мэргэжлийн хяналтын дүгнэлт хэмээн 600 мянгыг, гэрчилгээ гарсан хэмээн мөн хоёр саяыг тус тус авчээ. Дээр нь ТОСК-ийн захирал Хичээнгүйтэй найз гэж бас хуураад  урт хугацааны ипотекийн зээлд хамруулж өгнө хэмээн бас дахин хоёр саяыг авчээ. Ятгах тусам нь нятглаагүй эмэгтэй шаардсан мөнгө болгоныг нь өгч байсан аж.   ТОСК-ийн захирал, Хотын Боловсролын газрын орлогч дарга гээд олон “том” найзтай кино найруулагч цэцэрлэгийн гэрчилгээг зүгээр хуурамчаар хийгээд өгчээ. Үүнд нь итгэсэн эрхлэгч  хуурамч гэрчилгээг бариад цэцэрлэгийнхээ хүчин чадлыг нэмэх материал бүрдүүлэн хотын Боловсролын газрын ажилтан Уянга дээр оржээ. Харин ажилтан өөрийхөө “61 хүүхдээр бүртгэв. 2018 оны 03 дугаар сарын 23, Ц.Уянга” гэсэн гарын үсгээ гараад мэл гайхжээ. Учрыг асуухад цэцэрлэгийн эрхлэгч “хүнд материалаа өгсөн, тэгсэн чинь болчихлоо гээд өгсөн”  гэжээ.