“Манзушир” цогцолбор 270 тэрбум төгрөгөөр босно

“Манзушир” цогцолбор 270 тэрбум төгрөгөөр босно. Манзушир хийдийг соёл, шашин, аялал жуулчлалын төв цогцолбор болгох төслийн талаар 2019-08-21-нд Монголын Архитекторын холбооны байранд танилцууллаа. УИХ-ын дарга асан, Манзушири хутагт сангийн тэргүүн, төслийн санаачлагч М.Энхболд төслийн танилцуулгыг нээж хэлэхдээ, "Манзушир" соёл, шашин, аялал жуулчлалын цогцолбор удахгүй нээгдэнэ. Төслийн техник, эдийн засгийн үндэслэл, зураг төсөв боловсруулах ажил дууссан. Одоо дараагийн шатны ажлууд эхэлж, төслийг гадаад, дотоодын хөрөнгө оруулагчдад танилцуулж хамтран ажиллах үйл ажиллагаа явагдаж байна” гэсэн юм. Цогцолбор нийтдээ 270 тэрбум төгрөгөөр босно. Улсын төсвөөс 37 тэрбум төгрөг гаргахаар суусан. Ихэнх зардлыг гадаад, дотоодын хөрөнгө оруулагчдаас гаргахаар төлөвлөсөн. Жилдээ 1.3 сая жуулчин хүлээн авах уг цогцолбор 5 жилд өртөг зардлаа нөхөн эдийн засгийн ашгаа өгөх, нийслэлд хамгийн ойр орших, түүх, соёл, аялал жуулчлалын төв болно гэж төслийн эдийн засагч Г.Дарханчулуун танилцуулсан.Мөн аялал жуулчлалыг хөгжүүлэх хүрээнд Манзуширын хийдээс Цэцээ гүний оргил хүртэлх 5.6 км, Баруун ширээт 6.3 км, Зайсан толгой 4.7 км, нийт 17.4 км үргэлжлэх “Cable car” буюу агаарын зам барихаас гадна явган аяллын амралтын цэгүүдийг байгуулна. Олон улсын хэмжээний аялал жуулчлалын төв цогцолбор болох дээрх төслийн гүйцэтгэгчээр “Арчер” ХХК ажиллаж байна хэмээн мэдээлсэн юм.

"МАНЗУШИР" ЦОГЦОЛБОРЫН ЭХЛЭЛ ЗУУНМОД-МАНЗУШИР ЧИГЛЭЛИЙН 7.0 КМ АВТОЗАМ АШИГЛАЛТАД ОРЛОО гэсэн мэдээлэл өглөө.

Энэ мэдээнд "Манзушир хутагт сан"-гийн тэргүүн М.Энхболдын санаачилсан "Манзушир" соёл, шашин, аялал жуулчлалын цогцолборын эхний ажил Зуунмод хот-Манзушир хийдийг холбосон 7.0 км автозамын зорчих хөдөлгөөнийг өнөөдөр албан ёсоор нээлээ.

Энэхүү зам нь 350 гаруй жилийн түүхтэй Манзушир хийдийг сэргээн засварлан, түүхэн дурсгалт, соёл, шашин, аялал жуулчлалын цогцолбор байгуулах ажилд чухал үүрэг гүйцэтгэх бөгөөд Төв сайхан нутаг маань олон улсын аялал жуулчлалын томоохон бүс нутаг болох боломжийг бүрдүүлж байна.

Уг автозам нь хөдөлгөөний 2 зурвастай, 13 метрийн өргөн далан, 7 метрийн өргөн зорчих хэсэг, явган хүний болон дугуйн зам, ногоон байгууламж, гэрэлтүүлэг бүхий бүрэн тохижилттой зам болсноороо онцлог юм" гэсэн байна.

Сэтгэгдэл

Анхаар! Уншигчдын бичсэн сэтгэгдэлд http://alim.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.