Нэгнээ бүлэглэн зодсон хүүхдүүд 84 дүгээр сургуулийн сурагчид байж болзошгүй гэсэн мэдээлэл гарлаа. Энэталаар тус сургуулийн нийгмийн ажилтан С.Өлзийбаяр:
-Зодож байгаа болон зодуулж байгаа нь манай сургуулийнх биш. Манай хүүхдүүдээс оролцсон байж магадгүй гээд эцэг, эх рүү нь холбогдсон. Цагдаагийн байгууллагаас өчигдөр манайх дээр ирж, бүртгээд явсан. Хамгийн гол нь хичээл цахимаар орж байгаа долоо хоног учраас хүүхдүүдээ яаж ийж байгаа тал дээр анхаарал тавих боломжгүй байна. Бас гэрийн орчинд байгаа учраас эцэг, эхтэй нь холбогдож, тодруулга авч байна.
Ямар ч байсан өчигдөр цагдаагийн байгууллагаас ирсэн. Манайхаас оролцсон байж болзошгүй гэсэн хүүхдүүдийнхээ мэдээллийг өгсөн.
Цагдаагийн байгууллага учрыг нь тогтооно гэсэн. Ямар ч байсан зодож байгаа, зодуулж байгаа хоёр хүүхэд нь манай хүүхдүүд биш. Манайх биш гээд хайхрахгүй байгаа юм биш. Битгий оролцсон байгаасай гэж хүсэж байна. Ийм асуудал битгий гараасай гээд бүх ахлах ангиудаар яваад анхааруулж байна. Сүүлийн хоёр жил танхимын сургалт байхгүй байлаа. Багш нарын хүүхдүүддээ нөлөөлөх, сурган хүмүүжүүлэх талаасаа хяналт тавихад хэцүү байлаа. Хүүхдүүддээ ийм хэрэгт битгий оролцоорой гэж л сануулж байна даа. Хэдий манай сургууль биш ч гэлээ оролцсон хүүхдүүдэд хандаж хэлэхэд "буруу байна, болохгүй байна" гэж хэлмээр байна гэсэн тайлбар өгчээ.
Харин Цагдаагийн байгууллагын өгсөн мэдээллээр "БЗД-ийн 15 дугаар хороонд 11 дүгээр ангийн сурагч эрэгтэй “Б”-г өөр сургуулийн аравдугаар ангийн сурагч О, Т, Н, Тэ, Т нар бүлэглэн зодож, уг үйл явдлыг сурагч “Э” гэгч гар утсаараа бичлэг хийн, цахим орчинд цацжээ. Уг асуудлыг БЗД-ийн Цагдаагийн газар шалгаж байна" гэсэн юм.
