Дэлхийн аваргад гуравдугаар байр эзэлсэн төмөр замчид

Зорчигчийн вагон депогийн Н.Батжаргал даргатай хоёрдугаар цувааны үйлчлэгч М.Дуламсүрэн, галт тэрэгний мастер Б.Анхбаяр нар энэ сарын 20-нд болсон Уулын жимийн гүйлтийн улсын аварга шалгаруулах тэмцээнд тус бүр дөрөвдүгээр байрт шалгарчээ.

Нас насны ангилалд маш олон хүн оролцсоноос Цэргийн анги, хүчний байгууллагынхан, олон улсын хэмжээний мастер тамирчид олон байжээ. Анхбаяр 30-39 насны ангилалд 12 км, Дуламсүрэн 40-49 насны ангилалд 9 км гүйх даалгавраа амжилттай биелүүлсэн байна. Уулын жимийн гүйлт цастай, хүйтэн жавартай, халтиргаа гулгаа ихтэй, өгсүүр, уруу замтай, тамирчдын тэсвэр хатуужлыг жинхэнэ сорьсон тэмцээн болсон аж.

М.Дуламсүрэн: Архангай аймгийн Цэнхэр сумынх. 1995 онд төмөр замд үйлдвэрийн дагалдангаар ажилд орж, 45 хоногийн курст сураад 1996 онд үйлчлэгч болж ажлын гараагаа эхэлжээ.

Б.Анхбаяр: Улаанбаатар хотынх. Хилийн цэргийн 0198 дугаар ангид алба хааж ирээд 2004 онд Зорчигчийн вагон депогийн Аж ахуй, тоног төхөөрөмжийн цехэд ачигчаар ажилд орсон. Төмөр замын дээд сургуульд элсэн Техникчээр төгсөөд 2011 оноос буцаад цехдээ ажилласан. Мастер болоод удаагүй.

Тэд энэ жил бэлтгэл сайн хийсэн болохоор олон улсын болон улсын чанартай тэмцээнүүдэд оржээ. Энэ намар 242 орон оролцсон дэлхийн аварга шалгаруулах гурван үе шаттай “Vitality Running World Cup” тэмцээнд манай улс “Үндэстнээрээ нэг баг болъё” уриан дор гүйж, багаараа гуравдугаар байрт шалгарчээ. Монголоос дэлхийн өнцөг булан бүрт байгаа монголчууд нэгдэж, 800 гаруй хүн гүйсэн. Энэ тэмцээний онцлог нь тухайн оролцогч хаана ч гүйж болдог. Өөрөөр хэлбэл, гар утсандаа тухайн тэмцээнд оролцох аппликейшн татаж суулгахад л болно. Тэр апп-аар таны гүйлтийн үед хаана хурд авч, хаана хурдаа хасаж буй км\цаг болон зүрхний цохилт нь ямар байгааг зохион байгуулагчдын зүгээс хянадаг. Миний хувьд энэ тэмцээнд оролцох үед тогтмол шилдэг 20-д нь багтаж байсан. Гүйлтэд оролцож буй хувь хүний гурван км тутамд полимиелийн вирусийн эсрэг хүүхдийн нэг ширхэг вакцин НҮБ-ын Хүүхдийн санд хандив болж орох юм билээ. Тэгэхээр энэ нь нэг талдаа хүүхдийн төлөөх сайн үйлсийн аянд оролцож буй хэрэг л дээ. Хамгийн гол нь, гурван км-ээ 30 минутад дуусгасан байх шаардлагатай. Өглөө, оройд нийлээд 30 орчим км гүйж байсан. Гүйсэн км өндөр гарах тусмаа бидэнд бонус оноо их орох учраас өдөрт чадах чинээгээрээ л гүйж байсан. Ингээд Өмнөд Африкийн баг түрүүлж, Намиби улсынх дэд байрт, манай улс гуравт орсон байна.