1993 онд манай анхны Ерөнхийлөгч П.Очирбатын гэрт хулгайч орж, Обо ерөнхийлөгчийн өмсдөг булган малгай, 10 мөнгөн аяга, 16 метр сайн чанарын ноосон даавуу алдагдсан хэрэг гарсан аж. Цагдаагийнхан үзлэг хийж байх үед Ерөнхийлөгч П.Очирбат орж ирж, төрийнхөө тэргүүний хажууд цагдаагийн ажилтнууд бага зэрэг биеэ барьж байжээ. Гэтэл тэргүүн хатагтай Ш.Цэвэлмаа “Энд байсан хоёр шил виски алга” гэхэд П.Очирбат ерөнхийлөгч “Пээ, мэдсэн бол уучихдаг байж” гэж инээж, том даргаас сүрдэж байсан цагдаагийн залуусын сэтгэл амарч байсан гэдэг. Ерөнхийлөгч П.Очирбат тухайн ЦЕГ-ын дарга байсан Пүрэв генералд “Амьтан ах дүү өгсөн 10 мөнгөн аяга байсан юм. Олдвол тэр л биз, олдохгүй бол тэр л биз, тэгж эрэл сурал болоод юу гэхэв” гэж хэлж байжээ. Харин цагдаагийнхан төрийн тэргүүнийхээ гэрээс хулгай хийсэн хүнийг хэдхэн хоногийн дотор барьсан. Алдар гэдэг сайхан нэртэй хулгайч Ерөнхийлөгчийн гэрт орж хулгай хийсэн гэдгээ мэдээгүй байжээ.