Холливүүдийн алдарт жүжигчин Уилл Смит Лос-Анжелес хотноо болж буй Америкийн кино академийн наадмаас"Ричард хаан" киногоороо Оскарын шилдэг эрэгтэй дүрийн шагнал хүртлээ.

Тус номинацид "Being the Ricardos" киногоороо Хавьер Бардем, "Power of the dog" киногоороо Бенедикт Камбербэтч, "Tick, Tick... Boom!" киногоор Эндрю Гарфилд нар нэр дэвшсэн. Мөн жүжигчин Дензел Вашингтон, "The Tragedy of Macbeth" киногоороо мөн нэр дэвшсэн юм. 

Уилл Смит шагналаа гардан аваад сэтгэл хөдлөлөө барьж дийлэлгүй нулимс унаган үг хэлэхдээ Крис Рокийг цохисондоо уучлалт гуйжээ. "Ричард хаан" кинонд Уилл Смит алдарт теннисчин Серена Уиллиамс болон Венус Уиллиамс нарын аавын дүрд тоглосон байна. 

Тэрээр "Би академиас уучлалт гуйж байна... Би нэр дэвшсэн бүх нөхдөөсөө уучлалт гуймаар байна" гэжээ. "Би яг л /өөрийн дүр Ричард Уиллиамс шиг/ галзуу аав шиг харагдаж байна. Гэхдээ хайр таныг галзуу зүйл хийхэд хүргэдэг." гэв. 

Шагнал гардах мөчөөс өмнөхөн Оскарын шагнал гардуулах ёслолын үеэр жүжигчин Уилл Смит жүжигчин Крис Рокийг цохижээ. Крис Рок Уилл Смитийн эхнэр Жада Пинкетт Смитийн үсний талаар хошигносны дараа Уилл Смит тайзнаа гарч түүнийг цохисон юм.

Жада Пинкетт Смит үс халцрах өвчнөөр шаналж байгаагаа нийгмийн сүлжээгээр хэлсэн бөгөөд түүнийг Крис Рок "G.I Jane 2" хэмээн хошигносон юм. The Hollywood reporter  хэвлэлийн мэдээлснээр Уилл Смитийг эргээд суудалдаа суусны дараа "Миний эхнэрийн нэрийг ... амаараа бүү хэл.." гэж хэлжээ. Энэ үеэр Уилл Смитийн дууг хаасан байна. 

Зочид маш их гайхаж энэ бүхэн хошигнол байсан эсэхэд эргэлзэв. Дараа нь Рок "Энэ бол телевизийн түүхэн дэх хамгийн гайхамшигтай үдэш байлаа" гэжээ. Олон улсын хэвлэлүүд энэ үйл явдлыг Оскарын зохион байгуулагчдын хийсэн тавилттай хэсэг байсан гэж үзэж байгаа юм.

Уилл Смит Оскар-2022 наадмын "Ричард хаан" киногоороо "Шилдэг эрэгтэй дүр" номинацид шилдгээр шалгарлаа.