Тэрбээр "Би ганцаараа ХҮН-ыг төлөөллөөд УИХ-д сууж байгаа ч гэсэн зөв зүйлийг нь дэмжиж бодлогын өөрчлөлт оруулах, УИХ-ын нэр хүндийг өсгөе гэж хоёр жил ажиллалаа. Гэтэл өөрчлөлт гарсангүй. Ер нь гарахгүй юм байна. Тиймээс энэ удаа УИХ-ын танхим дотроос биш төв талбай дээр залуусыг уриалаад хамтдаа өөрчилье гэж бодлоо. Энэ долоо хоногийн Пүрэв гаригийн 12:00 цагт өдрийн хоолныхоо цагаар залуус хүрээд ирээрэй. “Өөрсдөө өөрчил үгүй бол тар” тайван жагсаалыг бид зохион байгуулна. Бид гэдэг нь хувь хүнийхээ зүгээс дөрвөн хүүхдийн аав хүний зүгээс энэ жагсаалыг зохион байгуулах гэж байна.
Өнөөдөр Монгол Улсын аюулгүй байдал хангагдаж чадах эсэх нь ч эргэлзээтэй байна. Бүгд нийслэл хотдоо чихээд суучихдаг учраас өвлийн улиралд цахилгаан станцад гэмтэл гарвал хөлдөх аюулд байна. Цаашдаа нийслэл хотоос өөр дагуул хоттой болох ёстой биз дээ. Тиймээс өөрчлөлт хийх цаг болсон. Ядаж эдийн засгийн хотуудаа бий болгоё.
Тулгуур төвүүдээ дэмжье. Үүнийг Үндсэн хуульд оруулж өгөх хэрэгтэй. Эрдэнэт, Дархан, Хөтөлийг оролцуулаад аж үйлдвэрийн кластер хот байгуулах боломжтой. Тэгвэл аж үйлдвэрийн хотоо байгуулъя л даа. Замын-Үүдэд худалдаа эрхэлдэг хот байгуулах бүрэн боломжтой. Худалдааны хот хийе л дээ. Алсыг харж эдийн засгийн бодлого судалгаан дээр үндэслэж шийдлүүдээ зоригтой гаргаад явья. Үүний тулд Үндсэн хуульд өөрчлөлт оруулах хэрэгтэй. Монгол Улс 330 сумтай. Төр нь данхайчихсан ч хороодынхоо тоог улам нэмээд байна. Сонгуулийн төлөө л тэд тэгж байна. Хороод нэмэгдэх тусам өргүй зардал нэмэгдэнэ. Тойргийн төсөв дээр хэмнэх гэж орж ирсэн Засгийн газрын бодлогыг УИХ-ын гишүүд буцаад өсгөхөөр болсон. 18 их наяд төгрөгийн өндөр зардалтай төсвөө буулгаагүй яг тэр чигээр нь баталчихсан. Ямар юмных нь хэмнэлт байх вэ дээ.
Энэ нь УИХ-ын гишүүд гэхээсээ илүү тогтолцоондоо асуудал байна. УИХ-ын гишүүн болсноос хойш би тойрогтоо ийм хэмжээний мөнгө тавиулмаар байна гэж Сангийн сайдтай ганц ч удаа ярьж үзээгүй. Харин УИХ-ын чуулган дээр тогтолцоогоо өөрчилье гэж гуйсан. Одоо би гуйж ханалаа. Бүтэхгүй юм байна.
Улсын 330 сумыг Оросын нөлөөгөөр байгуулсан. Эдийн засгийн үндэслэл нь морь болон мотоцикльтэй явахад 60 км-т нэг сум байхаар тооцсон. Харин одоо 21 дүгээр зуунд бүгд машинтай болчихсон учраас 60 км-ыг 150 км болгож хоорондын зайг өөрчилбөл сумдын тоо хамгийн багадаа хоёр дахин буурна. Ийм байдлаар энгийн мөртлөө маш зөв логик дэс дараалалтай явмаар байна" гэв.
Мөн тэрбээр "Цар тахлын дараа эдийн засаг өснө гэж тооцоод орлогоо маш их өөдрөгөөр төсөөлөөд 36 сая тонн нүүрс экспортолно гэж тооцсон. Гэвч өнөөдрийн байдлаар хоёрхон сая нүүр гаргаад байна. Орлогоо өндөр төлөвлөчхөөр зардал нь дагаад өндөр батлагдсан. Он гарснаас хойш төсвийн тодотголыг хоёр удаа хийлээ. Хэмнэх гэж төсвийн тодотгол хийсэн ч үр дүнгүй. Төсвийн зарлага 18 их наяд төгрөгөөр буюу ердөө 245 тэрбумын зөрүүтэй батлагдсан шүү.
Эдийн засагч хүний хувьд Төрийн хэмнэлтийн хуулийг би дэмжсэн. Засгийн газраас оруулж ирсэн тэр хувилбар нь бүрэн төгс хувилбар биш ч гэлээ муугүй хувилбар байсан. Харин тэрхүү хувилбарыг УИХ-ын гишүүд кноп дараад унагаачихсан. Үүнд үнэхээр миний урам хугарсан. Ийм байдлаар парламент ажиллаж болохгүй" гэв.
