Шадар сайд асан С.Амарсайханы амаараа байгуулсан “аугаа бүтээн байшуулалт”-ын нэг нь
дүүжин тээвэр юм. 2020 онд НИТХ-ийн дарга байхдаа “сэдсэн” ажил нь яван явсаар хотын
төсөвд хагас тэрбум орчим төгрөгийн үрэлгэн зардал гаргаснаас гадна дүүжин тээврийн 
ажилтнууд нь хагас зуун сая төгрөгөөр “найрлаад” дуусжээ. Дүүжин тээврийн “түүхэн товчоо”-г 
өгүүлэхэд 2020 оны 8-р сард НИТХ-ын дарга Ж.Батбаясгалангийн гарын үсэгтэй А/1080 тоот тушаал гарч, 
“Дүүжин тээврийн ашиглалтын өмнөх захиргаа”-ны бүтцийг есөн хүний бүрэлдэхүүнтэй байгуулсан. 
Захиргаа нь АНӨТҮГ хэлбэрээр байгуулагдаж “Гэрэгэ групп”-ийн ерөнхийлөгч Д.Цэнд даргаар нь 
томилогдож найман хүний орон тоотой батлагджээ. Энэ найм есөн хүн 2020 онд 65 сая төгрөгийн
санхүүжилт авсан бол дараа жилдээ 414.3 сая төгрөг батлуулж аваад тэрүүхэн дундаа цалин 
урамшууллын “найр” хийж гарсан байна. Өнгөрсөн онд “Дүүжин тээврийн ашиглалтын өмнөх захиргаа” 
ажилтнууддаа таван сая төгрөгийн цалин, амралтын мөнгийг илүү олгосон нь тогтоогджээ. Үүгээр ч 
зогсохгүй үр дүнгийн урамшуулал, элдэв хангамж нэрээр 49,7 сая төгрөгийг дээрхи есөн хүний дунд
 тараан өгсөн байна. Шагнал урамшууллаар найрласан энэ газрыг 2021 оны сүүлээр татан буулгасан. 
Гэхдээ ганцхан жилийн хугацаанд хотын төсвөөс хагас тэрбум орчим төгрөг авсан ч сэтгэл нь ханалгүй 
“өлөнтсөөр” цалин урамшуулал нэрээр хагас зуун сая төгрөгийг хуваагаад “идчхсэн” аж. Өдгөө газар нь 
татан буугдсан тул илүү авсан 54 сая төгрөгийг буцааж төлүүлэх нь өнгөрсөн биз ...