Үсчин гоо сайханч ажилтай, 35 настай, эмэгтэй Ц.О нь Баянзүрх дүүргийн 18-р хорооны нутаг дэвсгэрт Дөрөвдүгээр эмнэлгийн байран дотор иргэн Б.У-ийг өөрийн нөхөртэй хардаж, хувийн таарамжгүй харилцаа үүсгэсний улмаас үснээс нь зулгаах, гараар алгадах, хөлөөрөө дэвсэх зэргээр зодсоны улмаас биед нь тархи доргилт, дух, баруун хөмсөг, хамар, зүүн нүдний зовхи, зүүн хацар, зүүн чих, зүүн тохой, баруун шилбэнд зулгаралт, дух, зүүн нүдний зовхинд цус хуралт, баруун, зүүн тохой, зүүн бугалга, баруун, зүүн шуу, баруун, зүүн гуя, баруун өвдөг, баруун, зүүн шилбэнд цус хуралт, зөөлөн эдийн няцрал, зулайн хуйханд зөөлөн эдийн няцрал гэмтлүүдийг үүсгэж, хүний эрүүл мэндэд хөнгөн хохирол санаатай учруулжээ. Хохирогч болсон явдлын тухай “...би өөрийн эрхэлсэн ажил дээрээ 00-ын өрөө ороод эргээд гарахад намайг  хүн хайгаад байна гэсэн сургаар эмнэлгийн 7-р давхрын хүлээлгийн хэсэгт ирэхэд нэг үл таних эмэгтэй шууд үсдээд, нүүр хэсэгт гараараа алгадаад, газарт унагаагаад, толгой бие хэсэгт хөлөөрөө дэвсэлсэн бөгөөд би ажлын эмэгтэйгээ дуудаж өөрөөсөө холдуулсан. Тухайн эмэгтэй миний нүүр хэсэгт хөлөөрөө өшиглөх гээд дайраад байсан. Намайг “хүн харахын эцэсгүй болгоод өгнө” гэж хэлээд, миний нүүр хэсэгт гараараа самардаад, газарт унагаагаад, толгой хэсгээс үсдээд, газарт толгойг маань хүчтэй мөргүүлсэн. Энэ үед манай ажлын хүмүүс цагдаагийн байгууллагад дуудлага өгсөн, мөн миний нэр хүндэд халдаж доромжилсон... намайг нөхөртэйгөө хардсаны улмаас ажил дээр ирж намайг зодож, харааж орилсон. Би өөрийн нүүрний гоо сайхнаа ямар нэгэн сорвигүй болгомоор байна...”  гэжээ.  Харин шүүгдэгч “...Би “Нөхөртэй минь хэзээ болтол уулзаж учирч явах юм. Яагаад амьдралаар минь тоглоод байгаа юм, хоёр хүүхдийг минь өнчрүүлэх гээд байгаа юм уу” гэхэд У “Чиний хүүхэд өнчрөх надад хамаагүй” гэж хэлсэн. Энэ үгийг сонсоод уураа барьж чадаагүй шууд үсдээд авсан, хүмүүс гарч ирээд биднийг салгасан.  Бид хоёр нэлээн маргалдсан, “нөхөртэй минь битгий уулзаач, амьдарлаа чамаар сүйрүүлэхгүй, амьдралаа бүтэн авч үлдмээр байна, би хүүхдүүдээ өнчрүүлэхийг хүсэхгүй байна, чи ч гэсэн дөрвөн хүүхдээ бодооч” гэж тодорхой хэлсэн. Тэгтэл У  “Чиний нөхрөөс чинь салж чадахгүй, хүүхдийн өнчрөх хамаагүй” гэхэд нь бид хоёр үсдэлцсэн, үсдэлцээд дээр доороо гараад зодолдсон...” гэжээ. Шүүх шүүгдэгчийг 500 мянган төгрөгөөр торгожээ.