Ардчилсан намд УИХ-ын сонгуульд ялах нь чухал уу, мөнгө босгох нь чухал уу? Энэ асуултыг Ардчилсан намын удирдлагуудаас асуумаар санагдав. Ардчилсан намын дарга С.Эрдэнэ хэдхэн сарын өмнө УИХ-д нэр дэвшигчдээсээ 100 сая төгрөгийн хураамж авахаар болсноо зарласан. Гэтэл энэ мөнгө бага санагдсан бололтой, нэмж 300 сая төгрөгийг дэнчин болгож өгөхийг нэр дэвших гэж буй намын гишүүдээсээ шаардсан байна. Тодорхой хугацаанд бие гэрээ засаад, одоо төрөө засах гэж УИХ-д нэр дэвшихээр шийдсэн залуусын итгэл сэтгэлийг ингэж мөнгөөр дарж унтраалаа. Олон жил улс төрд явсан, хөрөнгө чинээ ихтэй, том бизнестэй намын ах нарт бол УИХ-д нэр дэвших дэнчингийн 400 сая төгрөг тоглоом санагдаж магад. Харин өөрсдийн мэдлэг боловсрол, сэтгэл зүтгэлээр бизнесээ хөл дээр нь дөнгөж босгоод буй залууст энэ тоглоом чинь хатуудаж байна. Муу байгаа намынхаа нэр хүндийг мэдлэг боловсролтой залуусаа нэр дэвшүүлж өндийлгөөд авахын оронд 400 сая төгрөгөөр “хаалт“ хийж, нөгөө л төрөөс төрсөн тэрбумтан нэртэй 2012-2016 оны үед идсэн ууснаараа дуудуулсан хуучин “луугар”-уудаа дэмжиж байгаа бол УИХ-ын сонгуулиар энэ нам бараг суудалгүй хоцрох тавилан угтаж магад юм.
