НӨАТ-ын буцаан олголтыг хоёр хувь байсныг таван хувь болгож өсгөх тал дээр УИХ-аас Засгийн газрыг шахаж ажиллахаар болсон тухай парламентийн тэргүүн Г.Занданшатарын мэдэгдэл олон нийтийн хүлээлттэй яв цав нийцэж байна. Тэрээр “Өргөн мэдүүлсэн хуулийн төслүүдтэй холбогдуулан Монголын Үндэсний Худалдаа Аж Үйлдвэрийн Танхим(МҮХАҮТ)-ын өмнөх удирдлагууд, CEO клубээс Нэмэгдсэн Өртгийн Албан Татвар(НӨАТ)-ын буцаан олголт хоёр хувь байгааг таван хувь болгож нэмэгдүүлэх санал ирүүлсэн. Үүнийг Сангийн яаманд өгч боловсруулан, бололцоотой эсэх төсвийн тооцоолол, макро эдийн засгийн тооцоололтой уялдуулсан мэтгэлцээн зохион байгуулна” гэлээ. Иргэд гар дээрээ ирж байгаа буцаан олголтыг сайн мэдэрдэг. Тэр хэмжээгээрээ ч мэдрэмтгий байдаг. Одоогийн өгч байгаа хувь ихээхэн чамлалттай гэдэгт иргэд төдийгүй судлаачид ч дуу нэгтэй байна. Нэгэнт ирж байгаа буцаан олголт бага тул иргэд, аж ахуйн нэгжүүд НӨАТ шаардахдаа сул, тууштай биш явсаар ирсэн. Энэ нь цаагуураа татвар төлөгчдийн хүрээ суурийн тэлэлтийг олон жил хязгаарласан сөрөг үр дагавартай байлаа. Бүх төрлийн зах, жижиглэнгийн худалдаачид нь худалдан авагчидийн НӨАТ нэхдэггүй сул талын цаана удаан хугацаагаар нуугдаж явсан гэхэд болно. Хэрвээ Г.Занданшатарын санаачилсан НӨАТ-ын буцаан олголтын хувийг өсгөх ажил бүтэж, мэтгэлцээн амжилттай болж, Засгийн газраас дэмжигдвэл дээрхи буруу нөхцөл байдлыг арилгах тал дээр том амжилт гарах нь хүлээлттэй байна. Гар дээр нь ирэх буцаан олголтын хувь өссөнөөр иргэд НӨАТ авахгүй биш харин бүр нэхэж авдаг болно. Тэр хэмжээгээр иргэдийн худалдан авалтын хэмжээ өсөж энэ нь эдийн засгийн эргэлтэд эерэг нөлөө үзүүлэх нь дамжиггүй юм. Их хэмжээний буцаан олголт авахын тулд их юм худалдан авах сонирхол хэнд ч төрнө. Дараа нь засгаас буцаагаад авчих тул их бага худалдан авалтанд гар татах хүн төдий л олон гарахгүй. Үүний хажуугаар НӨАТ төлдөггүй худалдаачдын орших орон зай багасаж хумигдана. Төрийн зөв бодлого, худалдан авагчидийн шахалт хоёрын дунд тэд удаан займчиж явах аргагүйд хүрнэ. Энэ мэтээр УИХ-ын даргын зүтгүүлж буй энэ ажлын иргэдэд тусах ач холбогдол, өгөөж ихээхэн тул олон нийтийн дэмжлэгийг улам бүр авсаар байна. Ер нь иргэд НӨАТ-ийн буцаан олголтын хувийг үе шаттайгаар нэмэгдүүлэн 10 хувьд хүргэх саналтай байна.
