“Ацаг шүдний зөрөө” кинон дээр хятад данжаад Цахарын малын хулгайчдаар Монголоос мал хулгайлуулдаг тухай яриа гардаг. Тэгвэл өдгөө хятадууд өрөндөө хилээр монголчуудаар малыг хөлөөр нь бүр “ногоон гэрэл”-ээр гаргуулдаг болжээ. Үүнд манай хилийн хамгаалалт муу нь ч нэмэр болжээ. Хилээр мал хулггайгаар гаргадаг Дорнодын “Мөөмөө” гэх А.Мөнхболдын удтал дуншсан хэргийг саяхан шүүх шийдвэрлэжээ.
Мөөмөө нь 2012 оноос эхлэн Далай гэх хятад иргэнээс мөнгө зээлж эхэлжээ. Гэсэн ч өрөө төлж чадахгүй болсонд зээлдэгч нь “зээлсэн мөнгөнийхөө оронд мал өгч чадах уу” гэснээр энэ “бизнес” эхэлжээ. Эхлээд 98 хонийг хилээр гаргаж өрөндөө өгчээ. Дараа нь хятад зээлдэгч нь Бат-Эрдэнэ гэх жолоочоор бэлэн 40 мянган юань явуулсанд төгрөгөөр солиулаад нийтдээ 160 тооны хонь худалдаж авсан гэнэ. Хонио нэг сая төгрөгөөр тохирсон Алтанхуяг гэх жолоочийн шалаанзанд ачин хил рүү хөдөлжээ Шалаанзанд хүрэн халзан морио бас ачсан гэнэ. Эхнэрээ ч дагуулж явжээ. Хил орчмын Зуугийн ухаа гэх газарт хүрээд хонио буулгаж морио унан туун цаашаа ганцаараа явжээ. Энэ газарт айл нутагладаггүй гэнэ. Хилийн зааг дээр уулзах газрыг нь хятад түнш нь зааж өгчээ. Хонио туусаар тэр газарт очиход Далай хүлээж байсан. Хонио түүнд тушаагаад бэлнээр 30 мянган юаь аван буцаж иржээ. Тэр мөнгөөрөө ахин хонь худалдаж аваад хил гаргажээ. Дөрөвдэх удаад мал худалдан авах мөнгийг Хичээлт гэх хятад иргэний монгол туслах Гэрэлцэцэгээс дансаар шилжүүлж авсан. Хичээлт Далай нар хамаатан болох нь сүүлдээ тодорхой болсон. Энэ хэргийг тагнуулынхан илрүүлжээ. Шүүхээс Мөөмөөг хоёр жилээр тэнсэж, хилээр мал гаргахдаа ашигласан портер машин, унаж явсан хүрэн халзан мориныг нь хурааж авсан байна.
