Төрийн байгууллагуудын албан өрөөний тавилга, сандал ширээний худалдан авалт жилээс жилд нэмэгдэж байна. Ирэх жилд улам өсөх нь тодорхой болсон. Энэхүү худалдан авалтын”шуурга”-ыг Төрийн хэмнэлтийн хууль ч зогсоож чадахгүй байна. Сум, дүүрэг 12-20 сая, хот аймаг болон агентлаг яамд бүр 30-40 сая хүртэл үнийн дүнгээр тавилгын тендер зарлаж сууна. Төрийн өмчит компаниуд нь бүр тансаг. Энэ бүх жолоо цулбуургүй худалдан авалтын шалтгаан нь ТӨБЗГ-т бий гэнэ. Учир нь тэд одоо болтол Төрийн хэмнэлтийн хуулийн 7-р зүйлийн 7.3-т болон Засгийн газрын өнгөрсөн онын 203-р тогтоолд заасан “Төрийн албан хаагчийн ажлын өрөөний талбайн хэмжээ, дотоод зохион байгуулалт, тавилга, техник хэрэгслийн нийтлэг жишиг”-ийг боловсруулж гаргаагүй байна. ТӨБЗГ уг жишгийг боловсруулан гаргаж Засгийн газраар батлуулах үүрэгтэй ч одоо ч энэ ажлаа “санаатайгаар” хийгээгүй сууна. Үүнийг далимдуулан төрийн албаныхан тавилгын худалдан авалтын “шуургаа” улам бүр эрчимжүүлсээр байна.